Serokwezîrê Iraqê Adil Evdilmehdî ku li ser vexwendina Serokkomarê Îranê Hesen Rûhanî çûyî Tehranê, bi lîderê giyanî Seyîd Elî Hamaney û Serokkomarê Îranê û gelek rayedarên Îranê  re rûnişt.

Piştî hevdîtina Evdilmehdî û Hamaney, Hamaney got, ''Emerîkî li kûderê demeke dirêj mabin, pêvajoya derxistina wan a ji wan welatan zehmet dibe.''

Hamaney got Emerîkî , ''demokrasiya Iraqê' û hebûna aktivîstên siyasî dijberî xwe dibîne û diyar kir, ''Leşkerên Emerîkî demildest divê ji Iraqê werin derxistin''. Hamanet her wiha got, ''Emerîkî û dûvelingên wan ên li herêmê, dijberê avaniya demokratîk a niha ya li Iraqê û dijberê desthilata niha ne û vê di berjewendiya xwe de nabînin.''

Hamaney her wiha diyar kir Emerîkî ne tenê bi armanca leşkerî li Iraqê ne, dixwazin domdirêj bimînin û hewl dide ku dewletên herêmê dîzayn bike.

Serokwezîrê Iraqî Evdilmehdî jî got, ''Dewlet û gelê Îranê di her demên zehmet de li cem dewleta Iraqê û gelê Iraqê ne. Mînaka vê ya dawî, bi desteka Îranê têkbirina DAÎŞ'ê ya li Iraqê ye.''