Newroz li paytexta Fransa Parîsê ji aliyê bi hezaran kesî ve hate pîrozkirin.

Pîrozbahiya Newrozê li navenda sporê ya Nelson Mandela ya li banliyoya Sarcellesê pêk hat û tevî Kurdistaniyan gelek dostên wan jî tevlî bûn.

Di şexsê Ûgûr Şakar, Zulkuf Gezen û Ayten Beçet de yên ji bo bidawîbûna tecrîdkirina Rêberê Gelê Kurd Abdullah Ocalan çalakiya fedayî kirin, deqeyekê rêz hate nîşandan.

Agirê Newrozê yê îsal ji aliyê dayika Ûmût Yalçin ê ku piştî pîrozbahiya Newrozê ya 2015'an di qezaya trenê de jiyana xwe ji dest da û malbatên şehîdan ve hate vêxistin.

Hevserokê Civaka Demokratîk a Kurd li Fransayê Vedat Bîngol û aktîvîsta Tevgera Jinên Kurd li Fransayê Leyla Şoreşger di destpêka pîrozbahiyê de axivîn. Qisekeran çalakgerên greva birçîbûnê bi rêzdarî silavkirin.

Parlamenterê Fransayî François Pipponi, ji Partiya Komunîst a Fransayê Pascal Torre, Hevseroka Komeleya Fransa-Kurdistanê Sylvie Jan, nûnerên FEDA, HDK-Ewropa û Platforma Jiyanê ya li dijî Tecrîdê ya Fransayê li qada pîrozbahiyê axivîn û Newroz pîroz kirin.

Koma Govendê ya bi navê Dîlana Rojarya jî bi wêneyên berxwedêrên greva birçîbûnê derket ser dikê.

Hozan Dîno, HOzan Kawa, Zimanbaz-Tarî, Bineş Roj, Koma Zelal, Şero Bete û Koma Zarokan hunera xwe pêşkêş kirin.

NANTES

Newroz li bajarê Nantes ê Fransayê bi coş hate pîrozkirin.

Kurdistanî bi vê armancê tevî dostên xwe li salona Salle Festive Nantes Nord a Şaredariya Nantesê li hev civiyan û Newroz pîroz kirin.

Piştî deqeyeke rêzgirtinê siyasetmedarê Kurd Kemal Aktaş axivî û Ûgûr Şakar, Zulkuf Gezen, Ayten Beçet ên çalakiya fedayî kirin û şehîdên Newrozê hemû bi bîr anî.

Di çalakiyê de nameya Ûgûr Şakar jî hate xwendin.

Li dû axaftinan koroya zarokan a komeleya Zînê ya Rennesê, hunermendê NÇM'ê Arhat, Narînxan, Ergîn Xelîkan, Alî Îhsan Dogan û hunermendên xwecihî derketin ser dikê.

LIMASSOL

Newroz li bajarê Limassol ê Qibrisê ji aliyê bi sedan kesî ve hate pîrozkirin.

Koroya Koma Çanda Theofilos, hunermend Îsmaîl Eker û Bengîn Efrînî tevlî pîrozbahiyê bûn.

Piştî ku agirê Newrozê hate dadan, berxwedêrên greva birçîbûnê hatin silavkirin û hate ragihandin ku wê berxwedana wan geş bikin.

Di pîrozbahiyê de govend hate gerandin û dirûşmên "Bijî berxwedana zindanan", "Bijî berxwedana Leylayê", "Bijî Serok Apo" hatin qîrîn.

Bengîn Efrînî di pîrozbahiyê de axivî û diyar kir, dema yekîtiyê hatiye.

ALGHERO

Newroz li bajarê Alghero yê girava Sardenya ya Îtalyayê jî hate pîrozkirin.

Kurdistanî û dostên wan ên Îtalyayî tevlî pîrozbahiyê bûn. Erdol Aydemîr ê ku 3 roj in li dijî tecrîdê di greva birçîbûnê de ye beşdarî pîrozbahiyê bû.