Li dijî êrîşên dewleta Tirk ên ji bo dagirkirina Efrînê çalakiyên Kurdistaniyên li Ewropayê dewam dikin. Kurdistaniyan gotin, heta ku êrîşên li ser Efrînê biqedin wê li qadan bin.

VIYANA: Li paytexta Awûstûrya Viyanayê, êrîşên dewleta Tirk a mêtinger û daigker ên li ser Efrînê li ber avahiya Neteweyên Yekbûyî hatin şermezarkirin. Kurdistaniyan li ber avahiya Neteweyên Yekbûyî kon vedan, pankartên li ser êrîşên li dijî Efrînê vekirin û afîş bi dîwaran ve daliqandin. Di çalakiyê de dirûşmên "Kujer, Terorîst Erdogan", "Artêşa Tirk ji Kurdistanê bicehime", "Bijî YPG", "Bijî Efrîn" hatin qîrîn û li ser kuştina sivîlan li Efrînê bi destê dewlet Tirk, belavok hatin belavkirin.

SAARBRUCKEN: Kurditaniyên li bajarê Saarbrucken ê Elmanyayê dijîn, çalakiyên xwe yên ji bo destekkirina berxwedana Efrînê didomînin. Bi pêşengiya Navenda Civaka Demokratîk a Kurd (NCDK) li ber Eûrogalerî mîtîngek hate lidarxistin. Hevserokê NCDK a Saarbruckenê Orûç Dapar li vir axivî, berxwedana serdemê silav kir û got, "Berxwedana serdemê di roja 32'an de ye û Erdogan hê jî bêçare ye û bi artêş û medya xwe belawela bûye. Gelê Efrînê bi sekna xwe ya bi biryar, heta mirinê xwedî li ax, nirx û şervanên xwe derdikeve." Dapar destnîşan kir ku bi çalakî û xwepêşandanên xwe divê ew jî xwedî li berxwedanê derkevin û li Ewropayê bibin dengê vê berxwedanê. Mîtîng bi qîrîna dirûşma "Bijî berxwedana Efrînê" qediya.

STÛTTGART: Li bajarê Stûttgart ê Elmanyayê, nobeda ku ji 20'ê Çileyê û vir ve her roj li Schlossplatzê tê girtin, duh ji aliyê endamên însiyatîfa jinê dewr hate girtin. Di çalakiyê de wêneyên sivîl û zarokên li Efrînê hatin kuştin hatin vekirin û pankartên bi nivîsa "Bes çekan bidin Tirkiyeyê, Efrînê biparêzin" û "Parastina Efrînê parastina şoreşa jinê ye" hatin hildan. Her wiha li ser êrîşên dagirkeriyê yên li ser Efrînê belavok hatin belavkirin.

KLEVE: Li bajarekî din ê Elmanyayê li Kleveyê, bi banga NCDK a Emmerîchê û Meclîsa Gel a Kleve, Kurdistanî li hev civiyan û êrîşên dewleta Tirk ên li ser Efrînê şermezar kirin. Kurdistanî piştî mîtîngê ber bi meydana Gross Str. dest bi meşê kirin û dirûşmên "Efrîn bi tenê nîne", "Tirkiye ji Rojava bicehime", "Terorîst Erdogan" û "Erdogan û DAÎŞ yek e" qîriyan.

HAMBÛRG: Li taxa Landesbrucke ya bajarê Hambûrgê, êrîşên dewleta Tirk ên li ser Efrînê hatin şermezarkirin. Di çalakiyê de piştgirî ji berxwedana Efrînê re hate dayin û bernameya çalakiyên rojên bê hate eşkerkekirin.

BÎELEFELD: Li bajarê Bîelefeld ê Elmanyayê Kurdistanî li ber firoşgeha Karstadtê li hev civiyan û bi qîrîna dirûşman rejîma Erdogan şermrezar kirin. Li vir daxuyaniyke hate dayin û hate gotin, heta ku êrîşên dagirkeriyê yên li ser Efrînê bidomin, wê Kurdistanî jî çalakiyên xwe yên ji bo destekkirina Efrînê dewam bikin.

BASEL: Li bajarê Baselê yê Swîsreyê, festîvala Fasnacht Basler dewam dike. Di roja duyemîn a festîvalê de dagirkeriya dewleta Tirk a li Efrînê hate şermezarkirin. Di festîvalê de karîkaturên li ser têkiliya navbera Erdogan û DAÎŞ'ê hate nîşandan. Karnavala ku her sal 19'ê Sibatê dest pê dike, 3 roj û 3 şevan dewam dike.