Li gorî daneyên fermî yên Rêveberiya Başûrê Kurdistanê, bi êrîşên qirkirinê yên 3'ê Tebaxa 2014'an ên li Şengalê re li gel kuştina bi hezaran Kurdên Êzidî, 6417 Êzidî ji aliyê çeteyan ve hatin revandin.

Endamê Rêveberiya Karûbarên Êzidiyan a Wezareta Ewqaf û Karûbarên Olî ya Başûrê Kurdistanê Xeyîrî Bozanî li ser rewşa dawî ya Êzidiyên hatin revandin agahî da.

Bozanî diyar kir ku ji 3'ê Tebaxa 2014'an heta 1'ê Tebaxa 2018'an, ji 6417 Êzidiyên ji aliyê çeteyên DAÎŞ'ê ve hatin revandin, 3315 kes hatine rizgarkirin. Bozanî da xuyakirin ku çarenûsa 3102 kesên hatine revandin, yanî 48,3 ji sedî yên di destê DAÎŞ'ê de ne, nayê zanîn.

Daneyên dawî yên "Rêveberiya Karûbarên Êzîdiyan" ku Neteweyên Yekbûyî jî bi fermî ew pejirandiye, wiha ne:

- Hejmara Êzidiyên li Iraq û Herêma Kurdistanê bi texmînî  550 hezar e.
- Hejmara Êzidiyên dema êrîşa DAÎŞ ji 3'yê Tebaxa 2014'an ve de penaber bûne, 360 hezar e.
- Hejmara Êzidiyan li Iraq û Başûrê Kurdistanê koçber bûne 100 hezar e.
- DAÎŞ roja pêşî dema ku êrîş bir ser Şengalê 1293 kesên Êzidî şehîd kirin.
- Heya niha 69 gorên komî li Şengalê hatine dîtin, bi dehan gorên takekesî jî hene.
- Gava DAÎŞ êrişî Şengalê kir 68 perestgeh û mezel û cihên olî yên Êzidiyan hatine teqandin û xera kirin.

ZAROKÊN BÊ DÊ Û BAV MAN

Bi giştî 2745 zarokên Êzidî bê dê û bav bûne.
-    Zarokên bê bav mane: 1759
-    Zarokên bê dayik mane: 407
-    Zarokên bê bav û dayik bûne: 389
-    Zarokên hê jî bav û diya wan di destê DAÎŞ'ê de ne, yan jî nehatine azadkirin: 220

HEJMARA ÊZIDIYÊN JI ALIYÊ ÇETEYÊN DAÎŞ'Ê VE HATINE REVANDIN

Bi giştî 6417 kes hatine revandin.
-    Ji regeza mê: 3548
-    Ji regeza nêr, 2869

HEJMARA ÊZIDIYÊN JI DAÎŞ'Ê HATINE RIZGARKIRIN

Bi giştî 3315 kes ji destê DAÎŞ’ê rizgar bûne.
-     Ji jinan 1155 kes rizgar bûne.
-    Ji mêran 337 kes rizgar bûne.
-    Ji zarokên keç 953 kes rizgar bûne.
-    Ji zarokên xort 870 kes rizgar bûne.

DÎLGIRTIYÊN AQÛBETA WAN NAYÊ ZANÎN

Bi giştî 3102 Êzîdî nehatine rizgar kirin.