Li gundê Roboskiyê yê navçeya Qilebana Şirnexê di êrîşa hewayî de 34 welatiyên gund hatibûn qetilkirin. Malbatên Roboskiyê di hefteya 305’an de li ser gorên xizmên xwe kom bûn û wêneyên kesên hatin qetilkirin, hildan. Li ser navê malbatên ku li edaletê digerin, Welî Encû daxuyanî da.

Encû, diyar kir ku berpirsên komkujiyê, xwe ji bûyerê pak dikin û wiha axivî: “Teraziya edaleta dewletê di hefteya 305’an de jî şaşwaz bû. Heya ku pakbûna nebe, edalet û aştî nabe. Divê ev şerê heyî demildest bi dawî bibe. Şerê 35 sal in didome, bi tank, top û çekan çareser nabe, encax bi muzakereyan çareser bibe.” 

Encû, diyar kir ku di 4’ê Mijdara 2016’an de parlamenterên HDP’ê hatin girtin û wiha dawî li axaftina xwe anî: “Wê ev pêvajo tim di rûpelên dîrokê de cih bigirin. Ev derbeya ku li edalet, hiqûq û demokrasiyê hat xistin, em ê tu carî wê ji bîr nekin. Em ê heya dawiyê têkoşîna xwe ya edaletê bidomînin.”