Karwanê şehîdê rojnamevan Heqî Bagok ji bajarê Qamişlo ber bi bajarê Tirbespiyê ve hate birêkirin. Karwan li bajarê Tirbespiyê ji aliyê bi hezaran kesî ve hat pêşwazîkirin û cenazeyê şehîd li Goristana Şehîd Dilşêr hate veşartin.

Di merasîmê de, nûnerên Rêveberiya Xweser, hevalên şehîd Heqî yên ku di encama bombebaranê de birîndar bûne û nûnerên Yekîtiya Ragihandina Azad, amade bûn.

Li goristanê bi deqeyek rêzgirtinê ve merasîmekî leşkerî hate lidarxistin. Piştre Endamê Rêveberiya Meclîsa Malbatên Şehîdan a herêma Tirbespiyê Mihemed Zekî axivî, sersaxî ji malbata şehîd û tevahî gelê Rojava re xwest û got: ″Bi saya fedekariya cangoriyên azadiyê, evqas serkeftin pêk hatin û planên diminan hatin pûçkirin.″

Şêwirmenda Rêveberiya Xweser a Kantona Cizîrê Mizgîn Ehmed jî derbarê helwesta koalisyona navneteweyê ya li hember destwerdanên AKP′ê yên li ser herêmên Rojava de axivî û wiha got: ″Koalisyona navneteweyî bi hevkariya QSD′ê şerê çeteyên DAIŞ′ê dike, YPG′ê jî parçeyek ji QSD′ê ye. Ji ber vê yekê divê koalisyon di şerê li dijî komên çete û hedef kirina navendên YPG′ê ji aliyê balafirên Tirk ve, destek bide YPG′ê. Divê koalisyona navneteweyî helwesta li hember faşîzma Tirkiyê zelal bike û xwest ku li ser herêmên Bakurê Sûriyê qedexeya ragihandina balafiran were ragihandin.″

Bavê şehîd Heqî, Celal Hisên jî diyar kir ku şehîd Heqî soza ku dabû şehîdên azadiyê pêk anî û got: ″Heqî di destpêka şoreşê de mamosteyê zimanê Kurdî bû, di 2014′an de beşdarî nava refên YPG′ê bû û di Buroya Ragihandina YPG′ê de xebitî. Em soza domandina têkoşînê didin.”

Piştre nasnameya têkoşer hat xwendin, radestî malbata wî hat kirin.

Cenazeyê heqî bi dirûşim û tilîliyan ve hate veşartin.