Şandeya DEM Partî û DBP’ê serdana Rojnews’ê kir
Şandeya ku ji parlamenterên DEM Partiyê û Hevserokê Giştî yê DBP’ê Keskîn Bayindir pêk dihat, ji bo rojnamevan Azîz Koyluoglu yê ji aliyê dewleta Tirk ve hatî qetilkirin, çû serdana navenda Rojnews’ê.
Şandeya ji Bakurê Kurdistanê bi armanca sersaxiyê serdana navenda ajansa Rojnews a li Silêmaniyê kir.
Şande ji Hevserokê DBP’ê Keskîn Bayindir, Hevberdevkê Komîsyona Têkiliyên Derve ya DEM Partiyê Berdan Ozturk û Parlamentera DEM Partî Gulcan Kaçmaz Sayyîgît pêkhat.
Li ser navê şandeyê Keskîn Bayindir sersaxî ji xebatkarên ragihandina azad a li Başûrê Kurdistan û parçeyên din ên Kurdistanê re xwest. Bayindir got: “Em piştrast in ku wê ragihandina azad şehîdbûna rêhevalên xwe bike prensîba karên xwe û baştir rastiyan ragihînin.”
Her wiha Bayindir îşaret bi rol û giringiya karê ragihandina azad kir û got: “Ragihandina azad di hemû demên zehmet de hewldanên xwe yên ji bo ragihandina rastiyan û mijarên netewî berdewam kiriye.”
