Piştî ku hat bihîstin êrîş li parlamenterên Partiya Demokratîk a Gelan (HDP) hatiye kirin, gelek kes herikîn Navenda Civaka Demokratîk a Kurd li Harîngeyê. 

Girseya gel ji vê derê berê xwe da avahiya televîzyona BBC a li navenda Londonê. 

Di çalakiyê de ku heta saet 03:00 dewam kir, di navbera çalakgeran û ewlekarên televîzyonê de rewşeke aloz derket holê. 

Piştî vê aloziyê bi dehan polîs hatin ber avahiya BBC û tedbîrên ewlekariyê girtin.

Li ser navê girseya gel axaftin li vir hat kirin û hikûmeta AKP'ê bi tundî hate şermezarkirin.

Hevserokên Giştî yên HDP'ê Selahattîn Demîrtaş û Fîgen Yuksekdag, parlamenterê HDP'ê yê Enqereyê Sirri Sureyya Onder, parlamenterên Amedê Îdrîs Balûken, Ziya Pîr û Nûrsel Aydogan, parlamenterên Şirnexê Leyla Bîrlîk, Ferhat Encu û Selma Irmak, parlamenterê Colemêrgê Abdullah Zeydan û parlamentera Mêrdînê Gulser Yildirim di dema serdegirtina malan û navenda giştî ya HDP'ê de ji aliyê hêzên dewleta Tirk ve hatin binçavkirin.