Raziye Ozturk, Rêzan Sarica, Faîk Ozgur Erol û Cengîz Yureklî ên ku parêzerên Rêberê Gelê Kurd Abdullah Ocalan in ji bo hevdîtinê serî li serdozgeriyê dan.

Ji 14’ê Adarê ve dema ku îddîayên li ser şertên tendirustî û ewlekariya Rêberê Gelê Kurd Abdullah Ocalan hatibû belavkirin, daxwaza hevdîtina bi lezgînî tê dubarekirin. Ligel ku gelek caran serlêdan hatibe kirin jî heta niha ne bersiveke erênî û ne jî ya neyînî nehatiye dayîn.

Parêzer piştî 8 salan cara pêşîn di 2’ê Gulana 2019’an de û di heman salê de di 7’ê Tebaxê de bi muwekîlên xwe rûniştibûn.

Ji ber nerazîbûnên li raya giştî Rêberê Gelê Kurd di 25’ê Adarê de telefonî birayê xwe Mehmet Ocalan kiribû û piştî demeke kurt telefon hatibû qutkirin.

Serdozgeriya Komarê ya Bûrsayê bi hinceta ku Rêberê Gelê Kurd Abdullah Ocalan ‘Nexşerê’ li parastina xwe ya li Dadgeha Mafên Mirovan a Ewropayê ya di sala 2009’an de zêde kiribû, di 23’ê Îlona 2020’an de hevdîtina wî ya bi parêzeran re heta 6 mehan qedexe kiribû. Qedexeya hevdîtinê di 23’ê Adarê de qediya lê dîsa jî ji bo daxwaza hevdîtinê tu bersiv nayê dayîn.