Girseya gel cenazeyê Weid Saran Hemûd (Gabar Sekar) ku 7'ê Çileyê di Pêngava Bagera Cizîrê de şehîd bûbû, ji navenda MeclÎsa Taxa Enteriyê ya bajarê Qamişlo wergirtin û bi kerwanekî wesayîtan ber bi Goristana Şehîdan a Til Hemîsê ketin rê.

Merasîm bi deqeya rêzgirtina leşkerî ya ji aliyê şervanên QSD‘ê ve destpê kir. Piştre fermendarekî QSD'ê Salar Amûdê axivî û got: "Em niha li vî cihê pîroz in, goristana şehîdan ên ku ji bo azadiyê berdêlên buha dane. Îro jî lehengek din tevlî wan lehengan dibe."

Endamê rêveber ê Desteya Karûbarên Şehîdan a Herêma Cizîrê Îdan El-Efînî bi xêrhatina girseya gel kir û destnîşan kir ku bi salan e Bakur û Rojhilatê Sûriyê şehîdan dide da ku herêm ji terorê rizgar bibe.

Bi navê malbata şehîd Şêxê Qebîleya Tey a Ereb Hesen Ferhan axivî û got: "Şehîd kurê vê êlê ye. Em bi şehadeta wî serbilind in. Em hemû Sûrî ne ji ber wê ew şehîdê Sûriyê ye."

Hevserokê Meclîsa Malbatên Şehîdan a navçeya Til Hemîsê nasnameya şehîdbûnê ya şehîd xwend û radestî malbata şehîd kir.

Di dawiya merasîmê de cenazeyê şehîd bi dirûşmên ‘Şehîd Namirin’ spartin axê.