RTUK’ê cezayên rawestandina weşanê û pereyê da televîzyonan

Desteya Bilind a Radyo û Televîzyonê (RTUK) cezayên giran da kanalên televîzyonê yên ku protestoyên piştî binçavkirina Serokê Şaredariya Bajarê Mezin a Stenbolê Ekrem Îmamoglu destpê kirin, weşandin.

Li gorî daxuyaniya endamê RTUK’ê Îlhan Taşci cezayên rawestandina weşan û pereyê li Sozcu TV, Halk TV, Tele 1 û Now TV’yê hatin birîn.

Bi hinceta “teşwîqkirina gel ji bo kîn û dijminahiyê” 10 roj rawestadina weşanê li Sozcu TV’yê hat birîn û di heman demê de ji ber gotinên Alî Mahîr Başarir ê CHP’yî ji bo Lîderê MHP’ê Devlet Bahçelî ji sedî 3 cezayê pereyê hat birîn.

HALK TV’yê ji ber weşandina mitînga Saraçhane û bertekên di dema mitîngê de ji sedî 5 cezayê pereyê îdarî girt. Di heman demê de 5 caran cezayê rawestandina weşanê ya bernameya Gundem Ozel hat dayîn.

Ji bo Tele 1’ê jî ji ber heman hincetan ji sedî 5 cezayê pereyê û 5 caran rawestandina bernameyê hat dayîn.

Now TV’yê jî ji ber rexneyên derbarê lêpirsîna Ekrem Îmamoglûyê de ji sedî 2 cezayê pereyê girt.

RTUK’ê hişyarî da Fatîh Altayli û Glu TV’yê ku di nava 72 saetan de lîsansê bigrin, an wê astengiya gihandinê were dayîn.