Di hefteya 356'an de çalakiya 'Nobeda azadî ji Ocalan re' ya li bajarê Strasbourg ê Fransayê, ji aliyê çar Kurdistaniyên ji Rojava ve tê meşandin ku ji Awûstûryayê hatine. Heme Hecî Elî, Mahmût Heme, Mehemet Hesekî û Bavê Metîn Heme Kobanê doh nobed dewr girtin.

Bi navê çalakgerên vê hefteyê, Heme Hecî Elî axivî û diyar kir, ew bêdengiya dinyayê bi taybetî ya welatên Ewropayê şermezar dikin. Berdevkê komê anî ziman, ji bilî mafên mirovan û wekheviyê daxwazeke din a Kurdan nîne û destnîşan kir, têkoşîna ku Kurdan li Kobanê dest pê kirin û li Baxozê dawî li DAÎŞ'ê anîn, ne tenê ji bo Kurdan e, her wiha ji bo mirovahiyê hemû ye.

Berdevkê komê da xuyakirin, ew bêdengiya Ewropayê ya der barê Kurdan û Ocalan de qebûl nakin û bang li Komîteya Pêşîgirtina li Êşkenceyê (CPT) kir, ku li dijî tecrîdkirina Rêberê Gelê Kurd Abdullah Ocalan bikeve nava liv û tevgerê.

Nobeda "Azadî ji Ocalan re" ku çalakiya herî demdirêj a bênavber a Kurdan e, 25'ê Hezîrana 2012'an dest pê kiribû. Hatibû ragihandin ku çalakî heta azadiya Ocalan wê bidome.