Pîrozbahiya Newrozê ya li bajarê Lugano yê Kantona Ticino ya Swîsreyê diyarî berxwedana serdemê ya li Efrînê hate kirin. Li Delémontê jî Newroz hate pîrozkirin.

TICINO: Newroz li bajarê Lugano yê Kantona Ticino ya Swîsreyê hate pîrozkirin û berxwedana Efrînê hate silavkirin. Hevberdekvê HDK-Ewropa Demir Çelik li pîrozbahiyê axivî û bi bîr xist ku ji bo maf, edalet û azadiyê, Kawayê Hesinkar agirê Newrozê dadaye.

Di dewama axaftina xwe de Çelik bal kişand ser êrîşên dewleta Tirk ên ji bo dagirkirina Efrînê û qirkirina Kurdan û got, "Li Efrînê bombe li nexweşxane, bendav û sivîlan tên barandin. Cîhan jî lê temaşe dike." Çelik bi bîr xist ku 57 roj in Efrîn li ber xwe dide û bang li hemû Kurdan kir: "Kurdistan welatê te ye, li dijî dagirkirina wê rabe ser piyan. Ev yek ji bo welatê me, deynê me yê mirovbûnê ye. Têkoşîna YPG û YPJ'ê têkoşîna jiyana azad e. Kurdistana azad e. Li Efrînê destan tê nivîsandin."

MLKP'ê jî ji pîrozbahiyê re peyamek şand û berxwedana Efrînê silav kir.

Piştî qisekeran Kawa Ûrmiye, Şenay, Akin, Ercan-Adar, Sercan Kobanê û Yûnûs derketin ser dikê.

DELEMONT: Kurdistanî û dostên wan ên li bajarê Delémont ê Kantona Jura ya Swîsreyê dijîn, Newroz pîroz kirin. Bi vê armancê li ber stasyona trenê ya bajêr standa Newrozê hate danîn û wêneyên mirovên li Efrînê ji ber êrîşên artêşa Tirk hatin kuştin hatin daliqandin. Li qadê agirê Newrozê hate dadan û berxwedana Efrînê hate silavkirin. Qisekeran gotin, wê ji bo Efrînê her roj li qadan bin.