Namzetên parlamenteriyê yên Partiya Demokratîk a Gelan (HDP) di çarçoveya karê hilbijartinê de li gelek bajaran daketin qadan.

EDENE

Li Edeneyê, karê HDP'ê yê hilbijartinê doh heta derengiya şevê dewam kir. Rêxistina HDP'ê ya Edeneyê, bi beşdariya namzetên parlamenteriyê serdana gel û esnafên taxa Denîzlî ya navçeya Seyhanê kir.

MERSÎN

Rêxistina HDP'ê ya Mersînê jî li taxên navçeyên Yenîşehîr, Akdenîz, Toros û Tarsûsê buroyên hilbjiartinê vekir.

Namzet Ridvan Tûran li merasîma vekirina buroya taxa Sîteler a navçeya Akdenîzê axivî û got, "Meha Hezîranê li me tê. Çawa ku bi serketina me ya 7'ê Hezîranê re desthilatdarî matmayî ma, 24'ê Hezîranê jî em ê bi serketina xwe, desthilatdariyê matmayî bihêlin. Ji bo vê jî pêwîste em gelekî bixebitin."

Hevseroka HDP'ê ya Mersînê Fatmagul Demîrtag jî li taxa Barbaros a Tarsûsê peyivî û got, "Çawa ku me di 7'ê Hezîranê û 1'ê Mijdarê de bi ser xist, di vê hilbijartinê de jî em ê bi ser bikevin."

ANTALYA

Li Antalyayê, bi beşdariya namzetên parlamenteriyê yên HDP'yî li taxa Şafakê ya navçeya Kepezê buroya hilbijartinê hate vekirin. Di merasîma vekirinê de namzet yek bi yek hatin nasandin.

MANÎSA

Rêxistina HDP'ê ya Manîsayê, li taxa Akpinar a navçeya Şehzadelerê buroya hilbijartinê vekir. Tevî namzetan, bi sedan kes tevlî merasîmê bûn.