Li gorî nûçeya Ajansa Mezopotamyayê, ji 27’ê Tîrmehê ve birîna daran dest pê kiriye.

Gundê Hesena ku dar lê tê birîn li navçeya Silopiya û di qontara çiyayê Cûdî de ye. Ev gund di salên 1990’î de ji ber zextên dewletê hatibû valakirin. Şeniyên gund ji ber zext û zordariyê neçar mane gundê xwe bihêlin û koçberî Ewropayê bibin. Lê di sala 2000’an de careke din vegeriyan ser axa xwe.

Lê belê di têketina gund de qereqol hatin avakirin, hatin û çûyînên li gund her tim hat kontrolkirin.

Vê carê li cihên bilind ji bo leşker û cerdevanan dest bi çêkirina kûleyan kirin.

Hêzên Tirk ji bo rêyên kûleyan destbi birîna daran kirin.

Hate hînbûn ku leşkerên Tirk ku darên gundiyan dibirin û gef li gundiyan xwarine û gotine, “Hûn qebûl bikin jî nekin jî, ger muxtarê we ewraqên pêwîst îmze neke, wê muxtarekî din îmze bike û em ê daran bibirin.”

Hate hînbûn ku kesê bi navê Şeyhmûs Babat ê li Sêgirka navçeya Qilebanê îhaleya talana daran stendiye.

Bi hezaran darên ku du roj in tên birîn li zeviyên binê gund tên komkirin.