Di doza ku li 1'emîn Dadgeha Cezayê Giran a Semsûrê hat kirin de kesên ku qetlîam kiribûn beraat kirin.

Di navbera 29’ê Cotmeha sala 1995’an û 8’ê Adara 1996’an de li Kerboran a Mêrdînê 3 jê zarok bi giştî 7 sivîl û çawişê pispor Bîlal Batir hatibûn windakirin.

Di doza ku Fermandarê Tabûra Komandayên Jendirmeyan a Mêrdîn Hurşît Îmren, Fermandarê Jendirmeyan a Navçeya Kerboranê Mehmet Tîre, Fermandarê Qereqola Jendirmeyan a Navendî yê Kerboranê Mahmût Yilmaz, Cîgirê Fermandarê Qereqolê Haydar Topçam û Çawişê Pispor Kerîm Şahîn jî di nav de bi giştî 18 bersûc bi sedema “Kuştina bi zanebûn” dihatin darizandin de biryar hate dayîn.

Dayikên Şemiyê, Komeleya Mafên Mirovan (ÎHD) a Şaxa Stenbolê û Komîsyona Li Dijî Windayên Di Girtîgehê de têkildarî biryara beraetê ya dadgehê daxuyaniyeke nivîskî dan.

Di daxuyaniyê de ku bertek nîşanî polîtîkaya bêcezakirinê da, wiha hat gotin:

“Tevî delîl û şahidan jî heyeta dadgehê leşker parast. Wê demê ji me re bibêjin; çi bi van mirovên ku malbatên wan hestiyên wan ji bîrên mirinê derxistin û şopên êşkenceyê li ser hebûn bûye? Wê demê ji me re bibêjin; heke ev bersûcên tên darizandin bêsûc bin, wê demê kê Davût Altunkaynak li tabûra leşkerî li pêş çavên dayika wî êşkence kirin? Kê Davût ê di temenê lîstikan de înfaz kir û avêt bîrên mirinê? Kê fermana van da? Wê demê ji me re bibêjin; heke bersûc bêsûc bin wê demê kê li tabûrê li pêş çavên birayê Seyhan Dogan ê 11 salî êşkence li wî kirin? Kê Seyhan ê di temenê lîstikê de înfaz kir û avêt bîra mirinê? Kê fermana vê da?

 Biryara dadgehê, biryareke derhiqûqî ye. Em vê biryarê nas nakin. Pergala darazê hewl dide kesên zarokên me winda kirine pak derxîne. Em ê têkoşîna xwe ya li dijî vê bidomînin. Windakirina di dema destgîrkirinê de sûcekî li dijî mirovahiyê ye. Bi qasî kesên vî sûcî dikin, her wiha yên vî sûcî dinixûmînin û bêceza dihêlin jî di wijdana mirovahiyê de sûcdar in. Yên ku hiqûq û mafên bingehîn ên mirovan nas nakin û daraza ku edaletê pêk nayîne jî sûcdar e.”