Hevserokê berê yê HDP'ê yê dîlgirtî Selahattîn Demîrtaş, ji bo balê bikişîne ser grevên birçîbûnê ku bi pêşengiya Leyla Guven zêdeyî 300 kes tê de ne û gihaştiye asteke krîtîk, ji endamên Parlamenta Ewropayê û Meclîsa Parlamenteran a Konseya Ewropayê re nameyek şand. 

'DAXWAZÊN ÇALAKGERAN WÊ BI XWE RE EWLEHÎ Û ARAMIYÊ BÎNE'

Nameya Demîrtaş wiha ye:

"Dostên min ên hêja yên parlamenter;

Dixwazim bala we bikişînim ser rewşeke gelekî krîtîk a li Tirkiyeyê.

Hevala min a parlamenter Birêz Leyla Guven ku endameke Parlamenta Tirkiyeyê ye, di dema nivîsandina vê nameyê de bû 104 roj ku di greva birçîbûnê de ye. Tevî wê li girtîgehan û li derve nêzî 320 kes di greva birçîbûnê de ne.

Yekane daxwaza hevalên min ên di greva birçîbûnê de ne û li ber mirinê ne, bidawîbûna tecrîdkirina Birêz Abdullah Ocalan e ku ev yek wê rê li ber serweriya hiqûqê, atmosfereke aştî û diyalogê li Tirkiyeyê veke.

Ev daxwaza mafdar, hiqûqî û rewa daxwazeke rasteqîn e ku hem li Tirkiyeyê, hem li Sûriyeyê, hem jî yekser li Ewropayê wê ewlekarî, aramî û îstiqrarê xurt bike.

'LI BER MIRINÊ NE; EZ BAWER IM KU HÛN Ê VÊ QÎRÎNÊ BIBIHÎZIN'

Hevalên min ên di greva birçîbûnê de ne, roj bi roj nêzî mirinê dibin. Hikumet vê mijara girîng ji nedîtî ve tê ku ev yek metirsî û cidiyeta mijarê zêde dike. Bi sedan mirov di oxira aştî û demokrasiyê de mirin dane pêş çavên xwe û ketine greva birçîbûnê. Bi milyonan mirov jî piştgiriya wan dikin. Ez bawer im ku hûn ê vê qîrînê bibihîzin. Ji dil bawer dikim ku ji bo ev mijar bikeve rojeva raya giştî, ji bo dawî li grevên birçîbûnê bê anîn û tavilê bersiv ji van daxwazên rewa re bê dayin, çi ji destê we bê hûn ê bi derfetên xwe hemûyan bibin alîkar.

Bi wesîleya vê nameya ku bi rêya parêzer û partiya xwe digihînim we, ji girtîgeha ku lê me silavên germ ji we re dişînim, hêvîdar im em ê di rojên xweş de hev bibînin."