Wesayîtên li ser xeta sînorê Kobanê-Pirsûsê hatine sekinandin, di bin çavdêriya leşkerên Tirk de ji aliyê çeteyên DAIŞ'ê ve her tên dizîn. Leşker mîna ku bi çeteyên DAIŞ'ê re hevkariyê dike, ji xwediyê wesayîtên li ser sînor dibêjin, 'Ji xwe DAIŞ wê di nava çend rojan de wesayîtan bidize' û çavê xwe li dizîtiya çeteyan digirin.

Çeteyên DAIŞ'ê yên li hemberî berxwedana hêzên YPG/YPJ'ê derbên giran dixwin, êrîşên xwe yên li hemberî gelê li ser sînor, dewam dikin. Bi hezaran wesayît û heywanên ku gel ji bo ji talana çeteyan biparêze anîne ser xeta sînor, li cihekî bi tenê çend metreyan dûrî leşkerên Tirk in, rastî talana çeteyan tên. Rojavayiyên li dijî vê derdikevin jî, dibin hedefa guleyên çeteyan. Welatiyê bi navê Alî Şahîn da xuyakirin ku li xeta sînor a nêzî gundên Zehwan û Mindêsimêl ên Pirsûsê tevgera çeteyên DAIŞ'ê dewam dike û leşkeran ji wan re gotine ku çeteyên DAIŞ'ê wê di nava çend rojan de hemû wesayîtan bibin. Gundiyê Kapçî Halîl Firat jî diyar kir ku bi taybetî li derdora gundê Kîkan ê Kobanê tevgera çeteyên DAIŞ'ê zêde bûye û da xuyakirin ku çeteyên tên heta ber têlên li ser sînor rastî destwerdana leşkeran nayên, leşker li şûna vê guleyan berdidin sivîlan.

LI PÊŞ ÇAVÊN ME TALAN DIKIN

Li aliyê din Rojavayiyê bi anvê Abdûrrahman Ehmed ê li ber wesayîtên xwe nobedê digire anî ziman ku çete duh êvarê hatine cihê ew lê ne û li ser nerazîbûna welatiyên li vir neçar mane xwe vekişînin. Ehmed anî ziman ku eger çete careke din bên ew ê bi dar û keviran li ber xwe bidin û diyar kir ku li ser sînor hînê 250 heywanên wî hene. Ehmed ragihand ku heta niha 60 heywanên wî telef bûne û got, "Em ditirsin bi vî halê xwe nêzî sînor bibin, lê çete li pêş çavê me li ber sînor talana xwe dewam dikin."