Greva birçîbûnê ya li Strasbourgê 87 roj li pey xwe hişt. Kurdên li çar aliyên Ewropayê ne xwedî li vê berxwedana bi biryar derdikevin.

20 endamên Meclîsa Gel a bajarê Creil ê Fransayê doh serdana berxwedêran kirin. Parlamentera berê ya HDP'ê Nûrsel Aydogan û Hevşaredara Cizîrê Leyla Îmret jî serdana çalakgerên li Strasbourgê kirin.

Ji endamên Meclîsa Gel a Creilê Azmî Guven di dema serdanê de axivî û ji bo berxwedana li dijî tecrîdê got, "Teqîna volkana dilê me ye ku li ber tefandinê bû."

AYDOGAN: EV BERXWEDAN WÊ DERIYÊ ÎMRALIYÊ VEKE

Parlamentera berê ya HDP'ê Nûrsel Aydogan jî diyar kir, greva birçîbûnê yek ji çalakiyên demokratîk ên 'herî zehmet e' û destnîşan kir, vîna mirovan herî zêde di vê çalakiyê de derdikeve holê. Aydogan diyar kir, ti çek nîne ku karibe vîna mirovan ji holê rake û got, "Ev biryardarî wê deriyên Îmraliyê veke. Ev berxwedan wê teqez bi ser bikeve."

Aydogan got, wezîfeya wan ew e ku bibin dengê vê sekna bi heybet û bi têkoşîneke xurt vê berxwedanê bi ser bixînin.

'DILÊ BI MILYONAN MIROVÎ BI ME RE YE; JI BILÎ SERKETINÊ RÊYEKE DIN NÎNE'

Gulîstan Îke bi navê berxwedêran axivî û diyar kir, berxwedana ku bi pêşengiya Leyla Guven 7'ê Mijdarê dest pê kir wê bi Newrozê re bigihêje asta serketineke mezin. Îke got, dil û mejiyê bi milyonan Kurdî bi wan re ne û destnîşan kir, ji bilî serketinê rêyeke din li ber vê pêngava wan a mezin nîne.

Îke işaret bi girîngiya xwedîderketina li berxwedanê kir û anî ziman, tecrîd li dijî gel e lewma pirsgirêka her şexsî ye. Îke ji bo mezinkirina desteka ji bo berxwedanê bang kir û got, serketin bi vî rengî wê pêk were.