YPJ: Em hevrêya xwe Eylul bi rêzdarî bi bîr tînin

"Em weke şopdarên van hevrêyên xwe yên giranbiha soz didin ku em ê bê rawestîn rêya wan bişopînin, em ê bi dilwêrekiya wan, bi pênûsa wan dawî li dagirkeriyê bînin û mizgîniya siberojên azad bidin hemû jin û gelên herêmê."

Navenda Ragihandinê ya YPJ'ê di salvegera çaremîn a şehadeta hevrêya xwe Eylul Nûhilat de daxuyaniyek weşand.

Di daxuyaniyê de hate bibîrxistin ku Eylul Nûhilat endameke Navenda Ragihandinê ya YPJ'ê bû û di dema şopandina pêngava rizgarkirina herêma Şehbayê de di vê rojê de tevî 20 endamên hêzên parastina jinên Şehba û şervanên Cebhet el Ekrad tevlê karwanên şehîdan bû.

Daxuyaniyê wiha dewam kir:

"Hevrêya me Eylul a ku ji bajarê Dêrikê bû, di temenekî ciwan de tevlî nava refên şoreşê bû û her timî di çeperên herî pêş de li dijî çeteyên El-Nûsra û DAÎŞ'ê şerê azadiyê, şerê mirovahiyê da meşandin. Karê xwe yê ji bo şoreşê bi hatina xwe ya Ragihandina YPJ'ê re bi rengek xurtir da meşandin. Piştî ku di karê ragihandinê de şareza bû, careke din berê xwe da qadên cenga giran.

Di dîroka 19 û 20 Cotmeha 2016'an de endamên Parastina Jinên Şehba û şervanên Cebhet-el-Ekrad berxwedaneke bê hempa raber dikin û bi dehan êrîşên çeteyên dewleta Tirk a dagirker dişkînin. Destûr nadin ku çete bikevin taxên Şehbayê. Lê çawa ku dema dewleta Tirk di her şerî de dişkê, ji bo binketina xwe binixumîne xwe dispêre teknîka xwe ya giran, di herêma Şehba de jî bi heman awayî dema ku di şerê sînge sîng de şikest û nekarî herêmê dagir bike, bi balafirên xwe yên şer, bombe bi ser şervan û gelên herêma Şehba yê de barandin. Di vê êrîşa hovane de tevî hevrêya me Eylul 20 şervanên parastina herêma Şehba tevlê karwanên şehîdan bûn.

Ji bo ku hevrêya me, nûçegihana Navenda Ragihandinê ya YPJ’ê Eylul, rastiya hovîtiya dijmin ji cîhanê re ragihîne bêteredut her di eniyên pêş de bû. Ew bi coş, kelecan û bi dilnizmiya xwe, hem çavkaniya moralê bû, hem jî bû çavkaniya rastiyan. Heya kêliya wê ya dawî jî kamîreya wê her di destê wê de bû, kêlî bi kêlî dîmen digirt. Tevî birîndariya xwe hem destek dide hevalên xwe, hem jî her kêliya berxwedaniya wan nemir dike. Bi vî rengî di dîroka 20 Cotmeha 2016'an de tevlê karwanên çapemeniya azad dibe.

Di vê qetlîamê de 21 şervan şehîd ketin. Ev 21 heval ji bo parastina gelê Şehbayê bûn mertalên zindî û bêteredut li dijî dijminên mirovahiyê şer kirin, li ber xwe dan. Weke Agirî û Arîn, hevrê  Eylul jî di eniyên herî pêş ên cengê de nemir bû. Di şopa Agirî, Arîn û Eylûl de hevrêyên me endamên Navenda Ragihandina YPJ’ê hevrê Şîlan Cûdî, Rohenda Xemgîn û herî dawî hevrê Dilovan Gever jî di heman eniyên cenga giran de bûn dengên rastiyê. Wan bi wêrekiyeke mezin berê objektîfên xwe dan rastiya hovîtî û dagirkeriyê û bi vî rengî perdeya derewîn ya medyaya şerê Taybet a dewleta Tirk qetandin. Em weke şopdarên van hevrêyên xwe yên giranbiha soz didin ku em ê bê rawestîn rêya wan bişopînin, em ê bi dilwêrekiya wan, bi pênûsa wan dawî li dagirkeriyê bînin û mizgîniya siberojên azad bidin hemû jin û gelên herêmê."