Parlamenterê Mûşê yê HDP'yî Ahmet Yildirim, Parlamenterê Sêrtê yê HDP'yî Karî Yildirim, Parlamenterên Partiya Çep Amîneh Kakabaveh, Hamza Demîr, Daniel Riazat, Alîkara Şaredara Stockholmê Ann-Margagrethe Livh û endama Meclîsa Şaredariya Jarva Maile Aras tevlî şevê bûn.

Parlamenterê Sêrtê yê HDP'yî Kadrî Yildirim li şevê axivî û di destpêka xaftina xwe de Cejna Kurdî pîroz kir.

Yildirim piştre gotin anî ser hilbijartinên 24'ê Hezîranê û destnîşan kir ku di hilbijartinê de wê dengdan li ser dîktatorî û demokrasiyê bê kirin. Yildirim bang li hemû gel û baweriyan kir ku li hev bicivin û bi hev re tevbigerin.

Ann-Margarethe Livh jî bi bîr xist ku HDP di hilbijartina 2015'an bi ser ket, lê ji aliyê hikumeta AKP'ê ve hate cezakirin û siyasetmedar û hevşaredarên HDP û DBP'yî hatine girtin.

Livh bang li civaka navneteweyî û rêxistinên civakî yên sivîl kir ku desteka ji bo HDP'ê zêde bikin.

Parlamenter Ahmet Yildirim jî diyar kir ku hilbijartinên 24'ê Hezîranê hilbijartineke ji rêzê nîne û got, "Hilbijartina man û nemanê ye."

Parlamentera Partiya Çep Amineh Kaabaveh jî xwest Selahattîn Demîrtaş û hemû girtiyên siyasî bê berdan û bang li Yekîtiya Ewropayê jî kir ku navê PKK'ê ji lîsteya 'rêxistinên terorê' derxîne.

Di şevê de gelek hunermend jî derketin ser dikê û hunera xwe pêşkêş kirin.