Li navçeya Ranya ya Silêmaniyê li dijî êrişên dewleta Tirk ên bi çekên kîmyawî meşek hate lidarxistin. Piştî meşê Idris Abdullah daxuyanî xwend. Di daxuyaniyê de wiha tê gotin: “Dewleta Tirk li ser bingehê zihniyeta nîjadperestî û şovenîzmê hatiye damezirandin. Hebûn û nasnameya gelê Kurd înkar dike. Bi dehan salane ji bo tinekirina gelê Kurd êriş dike. Dewleta Tirk bi hemû awayî ji bo tinekirina siyasî ya çandî û fizîkî ya gelê Kurd di nava hewldanen de ye. Di çend herêmên Kurdistanê bi hêzên leşkerî û çekên qedexekirî komkujî û wêrankariyê dike û sûcê şer dike.”

Di berdewama daxuyaniyê de bêdengiya Yekîtiya Ewropa, Neteweyên Yekbûyî (NY) û rêxistinên mafên mirovan hate rexne kirin û bang li raya giştî ya Kurdistanê, Iraq û navneteweyî, aliyên peywendîdar, Yekîtiya Ewropa û Neteweyên Yekbûyî (NY) hate kirin ku li dijî bikaranîna çekên kîmyawî bibin xwedî helwest.

Her wiha ji bo lêkolînkirin û cezakirina dewleta Tirk bang hate kirin.