KCK'ê ji bo boykotkirina tûrîzm û malên dewleta Tirk bang kir

Komîteya Têkiliyên Derve ya KCK'ê diyar kir ku dewleta Tirk bi bikaranîna çavkaniyên Kurdan li dijî Kurdan şer dike. Komîteyê bang kir, ku ji bo derbên xurt li çavkaniyên aboriyê yên faşîzma AKP-MHP'ê bê xistin, tûrîzm û malên Tirk bên boykotkirin.

Komîteya Têkiliyên Derve ya KCK'ê daxuyaniyeke nivîskî weşand û diyar kir ku di şerê qirkirina Kurdan de bi taybetî çavkaniyên Kurdan têne bikaranîn.

Komîteyê bi bîr xist ku tifaqa faşîst a AKP-MHP-Ergenekonê li Kurdistanê şerê qirkirinê dike û ji bo vî şerî fînanse bike derfetên gelekî zêde yên aboriyê xerc dike.

Komîteyê diyar kir ku ev aboriya tê xerckirin xwe ji du çavkaniyan xwedî dike û wiha dewam kir: "Çavkaniya yekemîn; malên pîşesazên Tirk e ku çarenûsa xwe bi tifaqa faşîst ve girê daye. Çavkaniya duyemîn jî; talankirina danheviyên ku di dîroka komara Tirkiyeyê de hatine afirandin û pêşkêşkirina van çavkaniyan ji bo sermayeya navneteweyî ye. Piraniya malen li Tirkiyeyê tên hilberîn, li parçeyên Kurdistanê tên firotin. Dewleta TC, pereyê ku ji malên pîşesazî, xwarin û tekstîlê difiroşe Kurdan bi dest dixe, di şerê dijî Kurdan de bi kar tîne. Bi hatineya ji vê derê, çek û cebilxaneyan ji dewletên cuda dikire û bi van çekan, zarok, jin û ciwanên Kurd dikuje. Her wiha, di serî de petrol û gaza xwezayî yên li Başûrê Kurdistanê, çavkaniyên xwezayî yên Kurdistanê bi erzanî talan dike û beşeke mezin a şerê dijî Kurdan bi vê rêyê fînanse dike. Bi kurtasî, beşeke zêde ya çekên ku duh li Sûr, Cizîr, Nisêbîn, Şirnex, Şengal, Kerkûk û Kobanê bi kar anî, îro jî li Efrînê li dijî Kurdan bi kar tîne, bi pere û çavkaniyên Kurdan tedarik dike."

Di vê çarçoveyê de Komîteya Têkiliyên Derve ya KCK'ê ji bo derb li aboriya Tirkiyeyê bê xistin ku hêza bingehîn a şerê dijî Kurdan e, bang kir.

KCK'ê destnîşan kir ku eger derbên xurt li aboriya rejîma qirker a AKP-MHP-Ergenekonê were xistin, ev yek wê encamên stratejîk di vî şerî de biafirîne.

KCK'ê ragihand, bi boykotkirina malên pîşesazî, xwarin, xurek, înşaet û tekstîlê, bi boykotkirina hemû malên şîrket û dewleta mêtinger re derba mezin dikare li aboriya şer bê xistin û got, eger li hemû parçeyên Kurdistanê û li her devera ku Kurd lê dijîn bi milyonan Kurd malên Tirkan boykot bikin, ev yek wê aboriya Tirk a li ber şikestinê ye û qels e, têk bibe.

Di dewama daxuyaniyê de hate destnîşankirin ku li gel boykotkirina malên dewleta Tirk, eger malên şîrketên ku hevkariyê bi şîrket û dewleta Tirk re dikin bên boykotkirin, ev yek wê li qada navneteweyî jî deng vede û şîrketên navneteweyî wê bi vê yekê re xwe ji vê têkiliya bi şîrket û dewleta Tirk vekişînin.

Komîteya Têkiliyên Derve ya KCK'ê diyar kir ku divê boykot li derveyî welat jî were kirin û got, gelekî girîng e ku gelên cîran, civakên Ewropî û dostên Kurdan jî tevlî boykotkirina malên dewleta Tirk bên kirin.

Di daxuyaniyê de bal hate kişandin ser girîngiya boykotê li qada tûrîzmê û hate gotin, "Ji ber ku dewleta TC beşeke girîng a çek û cebilxaneyên li dijî gelê Kurd bi kar tîne, bi hatineya ji sektora tûrîzmê fînanse dike. Gelekî girîng e ku di vî warî de karekî taybet bê kirin."

Di dawiya daxuyaniyê de hate ragihandin ku Kurd û dostên wan xwedî hêzeke mezin in ku bi boykotkirina mal û tûrîzma Tirk re derba mirinê li aboriya şer bixin û ev bang hate kirin: "Bi vê bîr û baweriyê em bang li hemû Kurdan û gelên xwişk-bira dikin ku li Kurdistanê, li Ewropayê û welatên din ên derve mal û tûrîzma TC boykot bikin."