Şandeya Partiya Demokratîk a Gelan (HDP) ya ji parlamenter Feleknas Ûca, Huda Kaya, Hasan Ozguneş û Mûrat Çepnî, piştî sedana Şengalê, berê xwe da Wargeha Penaberan a Şehîd Rustem Cûdî (Mexmûr).

Şande bi pêşwaziyek germ ya xelkê wargehê, kete nava wargehê. Dewleta Tirk a dagirker di 1’ê Sibatê de bi dijwarî wargeha penaberan a Mexmûrê bombebaran kiribû. Şandeya HDP’ê ji bo piştgiriya xelkê wargehê û ji nêz ve dîtina şopên êrişa ser wargehê, serdana wargehê kir.

Şandeya HDP’ê li Meclîsa Gel a wargehê bi kêfxweşiyek mezin hate pêşwazîkirin. Piştre şande çû cihê balafirên dewleta Tirk a dagirker bombebaran kirî û ji nêz ve dît. Piştî wê, şandeyê berê xwe da Saziya Malbatên Şehîdan û li wir bi sedan şêniyên Mexmûrê bi kêfxweşî û kelecanekî mezin pêşwaziya şandeya HDP’ê kir. Li saziya Malbatên Şehîdan parlamenterên HDP’ê ji bo xelkê wargehê axivîn.

Parlamenterê HDP’ê yê Şirnexê Hasan Ozguneş axivî û got. “Em tevahî cangoriyên Şengal, Memxûr û azadiyê bibîr tînin û bejna xwe li ber wan de ditewînin. Em wek HDP soz didin ku emê heta dawî li pey doza we bin. Me xwest serdana Şengal û Mexmûr bikin û êrîşa 1’ê Sibatê ji nêz ve bişopînin. Dibe ku em li Bakurê Kurdistanê bin û ji we dûr bin, lê em bi we re dijîn û hun hertim di dilê me de ne. Dewleta Tirk bi van êrîşan carek din dan diyarkirin ku ew ji dûrî exlaq û pîvananin. Lê emê serbikevin, ji ber ku rêya me, rêya heqîqetê ye.”

Parlamenterê HDP’ê yê Îzmîrê Mûrat Çepnî jî axivî û got: “Bi navê şandeya HDP’ê, em we ji dil û can hembêz dikin. Li gel we mayîn, hestekî pir cuda û kêfxweşiyeke mezin e. Berxwedana we hêzê dide me. Em jî êrîşên li ser Mexmûr û Şengalê bi tundî şermezar dikin. Em ê heta dawî têkoşîna li dijî neheqiyê bimeşînin."

Parlementera HDP’ê ya Stenbol’ê Huda Kaya jî axivî û êrîşên li ser Mexmûrê şermezar kir; “Li ser navê HDP’ê, bi dil û can ez we silav dikim. Wek hevalên me jî dayî diyarkirin, êrîşa li ser Mexmûr û Şengalê, ne ji êrîşên li ser HDP’ê dûre. Heman zihniyet dixwaze me tûne bike. Emê carek din rûpûşa dewleta Tirk bixin xarê. Emê van derewên li ser Mexmûr û Şengalê di raya giştî de raxin ber çavan.”

Parlementera HDP’ê ya Êlihê Feleknaz Ûca jî got: “Armanca me ya serdanê, derxistina derewên dewleta Tirk e. Me bi çavê xwe dît û emê di rojên pêş de, ji raya giştî re encama serdanên xwe parve bikin. Emê bi têkoşîna xwe, serbikevin û bigihijin azadiyê.”

Herî dawî li ser navê gelê Wargeha Mexmûrê, Hevseroka Meclîsa Gel a Mexmûrê Fîlîz Bûdak axivî û xêrhatina şandeya HDP’ê kir. Bûdak di axaftinên xwe de da zanîn ku her kesê ku li ser rêya heqîqetê dimeşe ew hevalên wanin û wiha pêde çû: “Em gelek kêfxweşbûn ku partiya me, serdana me kiriye û êşa me parvekirine. Ti caran ne destan ne jî rûpel hene ku berxwedan û têkoşîna gelê Mexmûrê binivîse. Em xwedî îrade û têkoşînin. Gelê Mexmûrê îradeyek ji pola heye. Ti caran gelê Mexmûrê, serî li bê mafiyan netewandiye û natewîne. Em hertim li pey doz û armancên xwe dimeşin û emê serbikevin. Dûbare em spasiya şandeya xwe dikin.”

Piştî axaftinan diruşmeyên ‘bijî Serok Apo’ hatin avêtin.