Pîrozbahiyên Newrozê yên li Ewropayê didomin
Li gelek bajarên Ewropayê ji bo pîrozkirina Newrozê çalakî hatin lidarxistin.
Li gelek bajarên Ewropayê ji bo pîrozkirina Newrozê çalakî hatin lidarxistin.
Li gelek bajarên Ewropayê ji bo pîrozkirina Newrozê çalakî hatin lidarxistin.
PARÎS: Xwendekarên Zanîngeha Saint-Denis ku yek ji mezintirîn zanîngehên Parîsê ye, Newroz pîroz kirin. Pîrozbahî li hewşa zanîngehê pêk hat û bi sedan ciwanên Kurdistanî û enternasyonalîst tevlî bûn. Ji berxwedêrên greva birçîbûnê ya li Strasbourgê Denîz Surgut jî bi rêya skype ji beşdaran re axivî û Newroz li wan pîroz kir. Di dema pîrozbahiyê de ciwanan daxwazên xwe nivîsîn, bi balonan ve girê dan û balon bi hewa xistin. Di dema pîrozbahiyê de Diyar Mehrovî û Grûp Mûnzûr stran gotin û ciwanan jî li ber stranên wan govend gerandin. Di dawiya pîrozbahiyê de dirûşma "Bijî Serok Apo" hate qîrîn.
BERLÎN: Pîrozbahiyên Newrozê yên li paytexta Elmanya Berlînê didomin. Bi vê armancê li Passionkircheyê resepsiyonek hate lidarxistin. Qisekeran bi Kurdî û Elmanî Newroz li gelê Kurd û dostên wan pîroz kirin û qala girîngî û wateya Newrozê kirin. Parlamentera Partiya Çep a Parlamena Federal a Elmanyayê Gokay Akbûlût û Parlamenterê Parlamenta Eyaleta Berlînê Hakan Taş, Parlamentera berê ya HDP'ê Sîbel Yîgîtalp, şaredarê berê yê Agiriyê Huseyîn Yilmaz, Anna Kuntze, Holger Spohr, Elke Dangeleit li resepsiyonê axivîn. Koma Govendê-Faraşîn, Grûp Eylo û Rûken Kardaş jî hunera xwe pêşkêş kirin.
KASSEL: Li bajarê Kasselê yê Elmanyayê, berxwedêrên greva birçîbûnê Omer Bagdûr û Cemal Kobanê bi dîmen bi Hevseroka KCD'ê û Parlamentera HDP'ê ya Colemêrgê Leyla Guven re axivîn û Newroza hev pîroz kirin.
MANNHEIM: Newroz li bajarê Mannheim ê Elmanyayê bi rengekî girseyî hate pîrozkirin. Di pîrozbahiyê de Alî Xerzan, Koma Zarokên Rojê ya Navenda Civaka Demokratîk a Kurd derketin ser dikê û hunera xwe pêşkêş kirin. Bi wesîleya Newrozê, Ronahî û Bêrîvan li cihê ku çalakî kirin hatin bîranîn. Êvarê saet 18:00 jî li Altefeuerwacheyê agirê Newrozê hate dadan. Di çalakiyê de ku peyamên saziyan hatin xwendin, dirûşmên "Bijî Newroz", "Bijî Serok Apo" hatin qîrîn. Beşdaran li dora agirê Newrozê govend gerandin.