Li Swîsreyê ji bo xwedîderketina li berxwedana gerîla, ciwanan dest bi Meşa Dirêj kirin.

Bi pêşengiya Tevgera Ciwanên Şoreşger (TCŞ) û Jin ên Ciwan ên Têkoşer wê ji bo silavkirina berxwedana gerîla 3 rojan meş bê lidarxistin. Baskê Swîsreyê yê Meşa Dirêj saet di 11:30'î de li Qada 1'ê Gulanê dest bi meşê kir.

Di meşê de pankartên ji wêneyên Rêberê Gelê Kurd Abdullah Ocalan û şehîdan hatin hildan. Ciwanan bi pankarta bi nivîsa "Li dijî xiyanet û dagirkeriyê Werin Cenga Azadiyê" û alên PKK'ê dest bi meşê kirin.

Îsmaîl Kardaş bi navê CDK-S'ê daxuyanî da û got, "Em li ku dibin bila bibin, êm li ber êrişên li dijî Kurdistanê rabin û bi pêşengiya ciwanên me em ê karibin her tiştî biguherînin."

'GERÎLA RÛMETA ME YE'

Yûsûf Amed anî ziman ku gerîlayên azadiyê îro bi navê mirovahiyê li çiyê şer dikin û got: "Lê belê dagirker çekên kîmyewî li dijî gerîlayên azadiyê bi kar tînin. Hûn ê nikaribin bi vê rêbazê îradeya me bişikînin. Em ê bi gerîla re bin ku ji bo mirovahiyê, jinan, ciwanan, jin ên ciwan û tevahiya azadîxwazan şer dikin. Em ji dijminên mirovahiyê re dibêjin; gerîla rûmeta me ye û tolhildan wê her tim soza me be. Kî destê xwe dirêjî xaka me, Rêberê me û îradeya me bike em ê pêşî li wan bigirin.

Ne çekên we yên kîmyewî, ne balafirên we ne jî teknîka we nikare îradeya me bişikîne. Bi taybetî weke Ciwanên Şoreşger û Yekîtiya Jin ên Ciwan em ê her tim li qadan bin, çalakiyan lidar bixin. Çalakiyên me heta hilanîna tola gerîla û misogerkirina azadiya fîzîkî ya Rêberê me wê her roj dwam bikin."