Aktîvîstên Tevgera Ciwanên Şoreşger (TCŞ) li paytexta Fransa Parîsê li banliyoya Villiers Le Bel, li dijî tecrîdkirina Rêberê Gelê Kurd Abdullah Ocalan û bi daxwaza azadiya Ocalan meşek li dar xistin.

Çalakiya ciwanan di şexsê endamê Konseya Fermandariyê ya HPG'ê Sînan Dersim de ji bo bîranîna şehîdên Kurdistanê bi deqeyeke rêzgirtinê li ber stasyona Villiers Le Bel dest pê kir.

Di meşê de pankarta bi nivîsa "Ji bo azadiya Abdullah Ocalan bi hev re Serhildan" û wêneyên Rêberê Gelê Kurd Abdullah Ocalan hatin hildan, bi zimanên Kurdî û Fransî dirûşm hatin qîrîn û daxwaza azadiya Abdullah Ocalan hate kirin.

DRANCY

Li banliyoya Drancy a Parîsê jî ji bo şermezarkirina tecrîdê û daxwaza misogeriya azadiya fîzîkî ya Rêberê Gelê Kurd Abdullah Ocalan meşek hate lidarxistin.

Çalakiyê di şexsê Sînan Dersim de bi deqeyeke rêzgirtinê ji bo bîranîna şehîdên şoreşê dest pê kir.

Ciwanan pankarta bi nivîsa "Ciwan fedayiyên Rêber Apo ne" û "La vie d'Ocalan, leader du peuple Kurde, est en danger (Jiyana Rêberê Gelê Kurd Abdullah Ocalan di metirsiyê de ye)" hate hildan.

Di çalakiyê de tim û tim dirûşmên "Bê Serok jiyan nabe", "Bijî Serok Apo", "Şehîd namirin" û "Libere Ocalan" hatin qîrîn.