Kurdistaniyên li bajarê Lîmasol ê Qibrisê dijîn, li dijî êrîşên qirkirinê yên artêşa AKP-MHP'ê ya bi çekên kîmyewî li Herêmên Parastinê yên Medyayê li ber Şaredariya Lîmasolê çalakiya konvedanê dan destpêkirin. Çalakî bi pêşengiya Tevgera Ciwanên Şoreşger, Însiyatîfa Jinan û Meclîsa Gelê Kurd a Qibrisê hat destpêkirin.

Kurdistaniyan di çalakiyê de belavokên bi zimanên Yewnanî û Îngilîzî belav kirin. Gelê Qibirisê û tûrîstan eleqeyek mezin nîşanî çalakiyê da. Çalakgeran jî sûcên şer ên dewleta Tirk a dagirker li dijî Kurdan ku bi çekên kîmyewî û qedexekirî pêk tîne teşîr kirin.

Di çalakiyê de siyasetmedar Kamil Akalin axivî. Akalin diyar kir ku ji bo êrîşên qirkirinê yên dewleta Tirk a dagirker û êrîşên çekên kîmyewî yên ku bi delîlan hatine îspatkirin teşîr bikin, ew ê bi çalakiyên ku plan kirine li tevahiya Qibrisê her roj li qadan bin.

Akalin derbarê plansaziya çalakiyan de jî ev agahî da: “Ji îro pê ve 3 rojan li Lîmasolê, dawiya hefteyê 2 rojan li Larnacayê û herî dawî jî 3 rojan li Nicasîa li ber avahiya Meclîsa Qibrisê, Neteweyên Yekbûyî (NY) û Balyozxaneya Emerîkayê ji 12.00’an heta êvarî saet 18.00‘an de standan danîn. Herî dawî jî 25’ê Mijdarê roja Înê em ê heta Deriyê Sînor ê Lidra Palace yê li Nîcasîa ve meşeke girseyî li dar bixin. Bi vê boneyê em hemû gelê xwe yê li Qibrisê dijîn, dostên xwe yên Qibris û hemû kesên ji bo azadiyê têdikoşin vedixwînin meşa xwe."