Hikumeta Elmanyayê ragihand ku wan rêxistina civakî ya sivîl a bi navê Ansaar a ku li ser navê alîkariyê ‘terorîzmê îslamî fînanse dike’ qedexe kirine. Li Elmanyayê li dijî vê organîzasyonê hin operasyon jî hatin kirin.
Wezîrê Karê Navxweyî Horst Seehofer diyar kir ku komeleyên Ansaar Înternatîonal e.V. û şaxên wê hatine qedexekirin û got “Ev tor li temamî dinyayê terorîzmê fînanse dike. Heke mirov dixwaze li dijî terorîzmê têbikoşe divê mirov çavkaniya wan a pereyan zuha bike.”
Bi vê qedexekirinê re polîsan li deh herêman girtin ser mal û garajan û gelek materyal desteser kirin.
Ansaar di sala 2012’an de li Dusseldorfê hatibû avakirin û di çend salên dawîn de di hedefa saziyên rayedar de bû. Bi îddîaya ku ew alîkariyê didin welatên Sûriye, Yemen, Xeta Xezzayê, Efganistan û Somaliyê bexşan kom dike.
Lê li gorî nûçeyeke medyaya SWR a ku xwe spartiye belgeyeke Wezareta Karê Navxweyî vê komeleya nêzî tevgerên selefî li lokalên xwe yên Elmanyayê ‘selefîtiya tund’ teşwîq dike û li ser zarokan ‘xebatên guherandina dîn’ tê kirin.
Tê diyarkirin bexşên ku ev komele kom dike bi rêya rêxistinên wekî El Nusra, Hamas û El Şebabê xizmeta fînansekirina terorîzmê tê kirin.
Ev komele li Tirkiyeyê jî dixebite û di bankên Tirkan de jî hesabê wan heye. Li gorî agahiyên li ser malpera komeleyê li Reyhanliya Hatayê jî şaxa vê komeleyê heye.
