Li dijî tecrîdê çalakiyek bi pêşengiya ciwanan pêkhat

Li banliyoya Evry’yê ya Parîsê di saetên êvarê çalakvan hatin ba hev, bal kişandin li ser tevrîda girankirî ya li ser Rêberê Gelê Kurd Abdullah Ocalan tê pêkanîn û daxwaza azadiya wî kirin.

Li dijî tecrîda li ser Rêberê Gelê Kurd Abdullah Ocalan bi armanca balkişandina li ser azadiya fîzîkî ya Ocalan li banliyoya Evry ya paytexta Fransa Parîsê meşek hat lidarxistin.

Çalakvan li ser banga Tevgera Ciwanên Şoreşger (TCŞ) li ber Navenda Civaka Kurd a Demokratîk hatin ba hev û saet 20:00’an dest bi meşê kirin.

Di çalakiyê de ku di çarçoveya pêngava “Werin Cenga Azadiyê” ya tevgera ciwanan hat lidarxistin de pankarta ku bi zimanê Fransî li ser hatibû nivîsandin “Ji Abdullah Ocalan re azadî” hat vekirin.

Her wiha gelek wêneyên Rêberê Gelê Kurd Abdullah Ocalan hatin hildan û bi berzkirina dirûşmeyên bi zimanên Kurdî û Fransî faşîzma Tirk hat şermezarkirin.

Çalakî di nava bajêr de nêzî saetekê dewam kir. Piştre li ber Îstasyona Navendî ya Trenê bi deqeyek rêzgirtinê re mîtîngek kurt lidarxistin. Çalakî piştî mîtîngê bi dawî bû.