Li paytexta Elmanya Berlînê ji bo Rêzan Bîlkay (Delîl Çiyager) ê di 23’ê Mijdara 2022’an de di êrîşa dewleta Tirk a dagirker a li ser Metîna de şehîd bûbû, merasîmeke bîranînê hate lidarxistin. Di merasîma bîranînê de ku malbat, dost û welatparêz lê amade bûn, xwişka wî Sermet Bilkay, endama Komîsyona Malbatên Şehîdan a Nav-Berlînê Dayika Şemsê, hevrê Destîna Jiyan û bavê wî Îbrahîm Bilkay axaftin kirin.

Di bîranîna ku bi deqîqeyek rêzgirtina ji bo şehîdên Kurdistanê destpê kir, xwişka Delîl Çiyager Sermet Bîlkay axivî û spasiya kesên beşdarî bîranînê bûn kir. Bîlkay da zanîn ku Şehîd Delîl ji bo wan gelek bi qîmet e û got, “Delîl rûmeta me ye. Wek hûn jî dizanin, em rojên pir dijwar derbas dikin. Birayê min şehîdê me hemûya ne. Çi dibe bila bibe em ê têkoşîna wî bidomînin."

Li ser navê Komîsyona Malbatên Şehîdan a Nav-Berlînê Dayika Şemsî jî axivî û got, “Di serî de sersaxiyê ji Rêberê me, malbata şehîd re dixwazim. Ev ne şehîdê me yê yekeme û ne jî yê dawîn e. Heta welatê me azad bibe em ê şehîdan bidin. Kîjan hêz dikare ewqas mirov bîne ba hev, helbet şehîd in. Şehîdên me, me dikin yek. Ji bo vê jî em têkoşîna ku wan afirandiye mezin bikin û xwedî li keda wan derên."

RÛ BI KEN Û JÊHATÎ BÛ

Hevrêya şehîd Delîl Çiyager Destîna Jiyan di axaftina xwe de ev tişt anî ziman: “Me Hevrê Delîl di sala 2013’an de nas kir. Em bi hev re xebitîn. Me serdemek pir girîng derbas kir. Pêvajoya Kobanê hebû, pêvajoyên din jî hebûn. Ne tenê hevrê Delîl; Hevrê Lecwan, Dîcle, Tîjda û gelek hevrêyan ji vir çûn welat. Li çiyayên azadiyê şer kir û tevlî karwanê şehîdan bû. Em îro pir bêriya wan dikin. Her hevrê hêviyek mezin dide. Di heman demê de ez dikarim di derbarê Hevrê Delîl de wiha bibêjim; Her kes wî bi rûkenî, henek û wêrekiya wî nas dike.”

Bav Îbrahîm Bîlkay ku piştî sînevîzyona ku jiyana Şehîd Delîl Çiyager nîşan dide spasiya kesên beşdarî bîranînê bûn kir û got, “Delîl şehîdê Kurdistanê ye, şehîdê me hemûyan e. Em soz didin ku em ê heta dilopa xwîna xwe ya dawî şopdarên rêya wî bin.

Merasîma bîranînê bi berzkirina dirûşmeyên “Şehîd namirin” û “Bijî Serok Apo” bi dawî bû û piştî merasîmê, Desteya Malbatên Şehîdan wêneyek pêşkêşî malbata şehîd Delîl Çiyager kir.