Ji bo azadiya Rêberê Gelê Kurd Abdullah Ocalan li bajarê Cenevre yê Swîsreyê gelê Kurd ji 25’ê Çileyê û vir ve her roja Çarşemê li pêşiya Ofîsa Neteweyên Yekbûyî çalakiya rûniştinê dike.
Konê berxwedanê yê li pêşiya ofîsa Neteweyên Yekbûyî hate vekirin, bi posterên Rêberê Gelê Kurd Abdullah Ocalan û alayên PKK’ê hate xemilandin. Di standê de jî belavokên bi Elmanî, Fransî û Îngîlizî yên li ser paradîgmaya Rêberê Gelê Kurd Abdullah Ocalan li Swîsreyiyan tê belavkirin.
Çalakiya rûniştinê di şexsê fermandarê pêngava 15’ê Tebaxê Mahsûm Korkmaz (Egîd) û yek ji fermandarê HPG’ê Îbrahîm Çoban (Atakan Mahîr) ê ku di 11’ê Tebaxa 2018’an de li Dêrsimê şehîd bûbû de, ji bo şehîdên Têkoşîna Azadiyê ya Kurdistanê dest pê kir.
Hevserokê NCDK’ê Salîh Saglam di çalakiyê axivî û got “Pêngava ‘Dawî li tecrîd, faşîzm û dagirkeriyê bîne, dem dema azadiyê ye’ îro bi berxwedana gerîlayan a li Herêmên Parastinê yên Medyayê û bi berxwedana greva birçîbûnê ya li girtîgehên Tirkiyeyê didome. Neteweyên Yekbûyî di serî de welatên Ewropayê naxwazin vê berxwedana gelê Kurd a li hemberî faşîzm û dagirkeriyê bibîne. Li hemberî vê bêdengiya dewletan em ê heta dawî xwedî li pêngava ‘Dem dema azadiyê ye’ derkevin û em ê bi ser bikevin.”
Saglam di axaftina xwe de ji bo meşa di 14’ê Tebaxê de ya li dijî dagirkerî, talan û qirkirinê banga tevlêbûneke xurt kir û got “Wê gelê Kurd û dostên me di 14’ê Tebaxê de saet di 14.00’an de li Helvetîaplatzê be.”
Piştî axaftina Saglam gelê çalakgeran bi sloganan çalakiya rûniştinê domandin.
