Çalakiya rûniştinê ya ji 25’ê Çileyê 2021’î heta bi niha tê lidarxistin vê hefteyê Tevgera Ciwanên Şoreşger TCŞ û aktîvîstên Teko-Jin’ê dewir girt. Di çalakiyê de, di şexsê Fermandarên QSD’ê Jiyan Tolhildan û Roj Xabûr û endama YAT’ê Barîn Botan a di encama êrîşa bi balafira biçek a bêmirov a dewleta Tirk a li ser rêya Qamişloyê şehîd bûn de, ji bo şehîdên têkoşîna Têkoşîna Kurdistanê bi deqeyekê rêz hat girtin.

Piştî rêzgirtinê li ser navê TCŞ û TekoJIN’ê daxuyanî hat dayîn. Di daxuyaniyê de hat bibîrxistin ku çalakî du sal in dewam dike û wiha hat gotin: “Em wek rêxistina ciwanên li Cenevreyê soz didin ku em ê bi biryar li çalakiya xwe dewam bikin û berê xwe bidin hedefê, heta ku azadiya Rêber Apo pêk bînin û Kurdistanê bikin xwedî statu em ê nesekinin.“

Di dewama daxuyaniyê de îşaret bi êrîşên dagirkeriyê yên bi çekên kîmyewî yên dewleta Tirk hat kirin û wiha hat gotin: “Dewleta Tirk a têkçûyîna xwe ya li hemberê gerîla nikare vebişêre hewil dide ku bi kuştina hovane ya xelkê sivîl veşêre û bi awayên din êrîşên bike. Herî dawî 20’ê Tîrmeha 2022’yan li Zaxoyê jin û zarok 9 sîvîl qetil kirin, zêdeyê 20 sivîl birîndar kirin.“

Her du rêxistinên ciwanan anî ziman ku Artêşa Tirk a dagirker bi piştgiriya NATO’yê bi xeyalên neo-Osmanîtiyê tev diger û bi hemû hêza xwe êrîşê Kurdistanê dike û di salvegera Peymana Lozanê ya 24’ê Tîrmehê hatiye îmzekirin de ev tişt dan xuyakirin:

“Em wek rêxistina ciwanan û gelê welatparêz ê Kurd, em dibêjin ku ev sînorên hatine kişandin qebûl nakin, di serî de li dijî dewleta Tirk a dagirker û hemû dewletên hewil didin destkeftiyên Kurdan ji holê rabikin em ê di her warî de têbikoşin û xwe biparêzin.“

Di dawiya daxuyaniyê de hat destnîşankirin ku wê ciwan heta Rêberê Gelê Kurd Abdullah Ocalan azad bikin û pergala Konfederalîzma Demokratîk a li dijî Modernîteya Kapîtalîst ava kiriye, ava bikin, nesekinin.