Saziyên Êzidiyên li Ermenistanê bi tevlêbûna gel li navenda Êrîvanê li pêşiya peykerê ku sembola qirkirina Şengalê ye, li hev kom bûn.

Çalakgeran çeleng û qurnefîl danîn ber peyker û li ser navê saziyan axaftin hatin kirin.

Di axaftinan de hate gotin “Em qetlîama di 3’ê Tebaxa 2014’an  de ya li ser civaka Êzidiyên li Şengalê şermezar dikin. Ev qirkirin e û em ê tu carî vî tiştî ji bîr nekin. Ev êşa me hemûyan e. DAÎŞ’ê ev qetlîam kiribe jî hêza li pişt wan dewleta Tirk a faşîst e. Em dewleta Tirk a faşîst û hêzên ku di vê qetlîamê de rola wan heye, bi tundî şermezar dikin. Yek ji tişta ku divê em ji bîr nekin jî ev e ku li ser  talîmata Rêber Apo mudaxeleya PKK’ê pêk nehata, wê zêdetir kes bihatina kuştin. Ji bo ku careke din li ser Êzidiyan qetlîameke din a wisa pêk neyê, divê em li dora paradîgmaya Rêbertî li hev kom bibin û li ser vî esasî xweparastina xwe xurt bikin.”