Endama Koordînasyona KJK'ê Xabûr işaret bi karaktera faşîst dagirker a dewleta Tirk kir û got, "Karê faşîzmê kuştin û dagirkirin e. Lewma divê mirov bi hêza xwe têbikoşin."

Endama Koordînasyona KJK'ê Dîcle Xabûr tevlî bernameya Rojeva Jinê ya Stêrk TV bû û bal kişand ser tecrîdkirina Rêberê Gelê Kurd Abdullah Ocalan. Xabûr diyar kir ku tecrîd ne tenê li Kurdistanê, li çar aliyên cîhanê di qada navneteweyî de tê şermezarkirin û got, "Çalakiyên tên kirin nîşan dide ku Rêber Apo ne tenê ji bo Kurdan rêber e, ew bi nêrîn û îdeolojiya xwe bûye rêberê gelan."

YA KU TECRÎDÊ RAKE ÇALAKIYÊN GEL E

Xabûr greva birçîbûnê ya sê rojan a girtiyên ji doza PKK û PAJK'ê bi bîr xist û berxwedana girtiyan silav kir. Xabûr got, divê ev çalakî bi yek alî nemîne û destnîşan kir, ya ku berxwedana girtiyan bi ser bixîne malbatên girtiyan û gel e. Xabûr wiha pê daket: "Hêza bingehîn a ku tecrîdê ji holê rake çalakiyên girseyî û mezin ên gel e. Bi van çalakiyan re wê destek ji çalakiyên gerîla û berxwedana zindanan re bê dayin. Lewma her çalakiya ku tê kirin gelekî watedar e. Divê çalakî bê navber dewam bikin, zêde û hîn radîkal bibin."

BENDEWARIYA JI FAŞÎZMÊ ŞAŞ E

Xabûr çalakiyên gelên Bakurê Sûriyeyê yên li dijî tecrîdê silav kir û bi bîr xist ku ne tenê gelê Kurd di serî de gelê Ereb gelek milet li ber tecrîdê radibin. Xabûr got, divê bi konferans û panelan re meş û xwepêşandanên li dijî tecrîdê bên berfirehkirin.

Di dewama axaftina xwe de Dîcle Xabûr bal kişand ser 'hesasiyeta sivîlan' a hêzên navneteweyî ku li ser operasyona Îdlibê nîşan didin û got, "Îdlib bûye cihek ku dewleta Tirk çeteyên xwe lê xwedî dike û mezin dike. Hemû hêzên navneteweyî jî li gorî berjewendiyên xwe qala hesasiyetê dikin. Ji xwe şaş e ku mirov ji faşîzmê hesasiyetê hêvî bikin. Ev faşîzm e; mirovan dikuje, cih û warê mirovan dagir dike. Li şûna ku mirov bipirse bê çima wiha dike, divê mirov li ser rê û rêbazên têkoşîna li dijî faşîzmê bisekinin û têbikoşin."