Partiya Herêmên Demokratîk (DBP) bi daxuyaniyeke nivîskî, 21’ê Sibatê Roja Zimanê Dayikê ya Cîhanê pîroz kir.

Di daxuyaniya DBP’ê de ev tişt hate kirin:

"Li gorî rapora ÛNESCO’yê li cîhanê bi giştî 7 hezar ziman tên axaftin lê belê 3500 ziman li ber tunebûnê ne. Bi taybetî dewletên neteweperest û hegemonîk bi hişmendiya yek ziman û yek netewe nêzî zimanên dayikê yên gelan dibin û ji bo tunekirina zimanên dayikê yên gelan, polîtîkayên qirkirinê didin meşandin. 

Li Tirkiyeyê jî rewşa 18 ziman û zaravayan ber bi tunebûne ve ye. Ji avakirina Komara Tirkiyeyê hetanî niha, li hemberî gelê Kurd û zimanê gelê Kurd, hikumetên ku rêveberiya vê komarê kirine polîtîkayên qirej ên asîmîlasyon û înkarkirinê bi rê ve birine û bi van polîtîkayên qirej xwestine zimanê gelê Kurd bihelînin.

Tifaqa qirêj a hikumeta AKP û MHP’ê bi polîtîkayên qayûman, şaredarîyên gelê Kurd xesp kirin. Qayûman jî li hemberî zimanê Kurdî, xebatên şaredariyan ên pir zimanî û sazîyên zimanê Kurdî, bi hişmendiya yekzimanî naveroka şaredariyan ên çandî û ziman vala kirin.

Ziman, çand, dîrok û hebûna gelê Kurd tune tên hesibandin. Li hemberî vê hişmendiyê, saziyên me dikin hedef û dixwazin bi operasyonên qirkirinê, sazîyên demokratîk bê xebat û lawaz bimînin.

Axaftina bi zimanê dayikê li hemû qadê jiyanê mafê sereke yê gelê Kurd e. Li hemberî polîtîkayên dewletê yên asîmîlasyonê, têkoşîn û pêşxistina çand û ziman jî mafekî sereke yê gelê me ye. 

Azadiya ziman mafekî sereke ye û hetanê em mafên xwe ê ziman bi dest bixin divê em bi biryar li hemberî hişmendiya qirker û yekperest têbikoşîn û têkoşîna xwe domdar bikin. Em di serî de ‘21’ê Sibatê Roja Zimanê Dayikê ya Cîhanê’ li gelê Kurd û bi giştî jî li hemû gelên cihanê pîroz dikin. Divê em li hemû deveran, li hemberî polîtîkayên qirker li ber xwe bidin, di nav têkoşînê de bin û em xwedî li zimanên gelan derkevin."