Piştî teqîna li Rûsyayê îzotopên radyoaktîf hatin tespîtkirin
Ajansa Meterolojiyê ya Rûsyayê diyar kir ku di serê meha Tebaxê de li tesîseke leşkerî ya li bakurê welat teqînek pêk hatibû û piştî teqînê îzotopên radyoaktîf hatine tespîtkirin.
Di 8’ê Tebaxê de li herêma Arkhangelskê teqînek pêk hatibû û 5 kes miribûn.
Serokê Dewletê yê Rûsyayê Vladîmîr Pûtîn diyar kiribû ku ew çekên nû diceribînin lê diyar nekir ku kîjan pergala çekan tê ceribandin.
Ajansa meterolojiyê diyar kir ku ewrê radyoaktîf a piştî parçebûna îzotopan jêderka radyasyona li Severodvînskê ye. Hate diyarkirin ku îzotopên hatine tespîtkirin strontîûm-91, baryûm-139, baryûm-140 û lanthan-140 e.
Li gorî pisporên nukleerê yên DYE’yê di dema ceribandina fuzeyekê de ya ku bi nukleerê tê firandin, ev teqîn pêk hatiye.
Saziya Norwecê Norsar a ku erdhej û teqînên nukleer tespît dike, roja Înê diyar kir ku piştî vê teqînê teqîneke din jî pêk hatiye lê rayedarên Rûsyayê teqîna duyemîn red kirin.
