Kurdên ji gelek welatên Ewropayê, tevî dostên xwe danê sibehê li Gare Central (Gara trenê ya navendî) ya li Brukselê li hev civiyan.

Ji gelek bajarên Belçîkayê, Elmanya, Fransa, Hollanda û Swîsreyê gelek kes tevlî bûn. Li gorî amadekaran zêdeyî hezar kes tevlî çalakiyê bûn.

Girseya gel bi otobus û wesayitên taybet hatin qada çalakiyê. Saet derdora 11:20'î jî kortej ji bo meşê hatin amadekirin.

Li refên pêş ên meşê jinên bi laçikên spî amade bûn û bal kişandin ser berxwedana dayikan a li dijî tecrîdê.

Gelek rêxistin û sazî jî tevlî çalakiyê bûn. Nûnerên TJK-E, SKB, AvEG-KON, ATÎK, HBDH, KNK, PYD, Partîzan, Eniya Ked û Azadiyê, Komîteya Piştevaniya bi Girtiyên Siyasî ya Navneteweyî tevlî çalakiyê bûn.

Di çalakiyê de işaret bi kiryarên li derveyî mirovahiyê û polîtîkaya tecrîdê ya li dijî Rêberê Gelê Kurd Abdullah Ocalan û girtiyên siyasî hate kirin û hate xwestin, girtiyên siyasî hemû bên berdan.

Çalakgeran dirûşmên "Kujer Erdogan", "Terorîst Erdogan", "Bimire rejîma Tirk a faşîst", "Terorîst Tirkiye", "Bijî berxwedana zindanan" qîriyan.

Nûnerên KNK'ê û wekîlên berê yên HDP'ê jî tevlî meşê bûn.

Piştî meşa ji saetekê çalakger li meydana Luxembourg a li ber Parlamenta Ewropayê li hev civiyan. Mîtînga li meydanê didome.