'Heta ku Ocalan azad nebe, kes ji me azad nabe

Di çarçoveya kampanya "Justîce For Kurdistan" de li qesra şaredariya Londonê resepsiyonek hate lidarxistin û daxwaza azadiya Ocalan hate kirin.

Kampanya Jûstîce For Kurdistan (Edalet ji bo Kurdistanê) ku çend meh berê li Îngilîstanê dest pê kir, bi berfirehî dewam dike. Li qesra Şaredariya Bajarê Mezin a Londonê, endamên meclîsa şaredariyê doh êvarê malovanî ji resepisyonekê re kirin. Şaredarên xwecihî, encamên meclîsa şaredariyan, nûnerên Kurdan, sendîkavan û rayedarên 'Kampanya azadî ji Ocalan re' tevlî resepsiyonê bûn.

Ji rayedarên 'Kampanya Edalet ji bo Kurdistanê' Alî Gul Ozbek di destpêka resepsiyonê de axivî. Ozbek bal kişand ser binpêkirina mafên mirovan ên li Kurdistanê û diyar kir, wê ji bo piştevaniya girtiyên siyasî bixebitin.

'DIVÊ OCALAN AZAD BIBE, DANÛSTANDIN BÊN KIRIN'

Alîkarê Serokê Desteya Rêveber a Kampanya Jûstîce For Kurdistan û Endamê Meclîsa Şaredariya Bajarê Mezin a Londonê Ûnmesh Desaî got, wê binpêkirina mafên mirovan a li Tirkiyeyê bi dengekî bilind bînin ziman. Desaî daxwaza azadiya Rêberê Gelê Kurd Abdullah Ocalan kir û got, "Dewleta Tirk bêyî dereng bimîne divê li danûstandinan vegere."

Berpirsyara Têkiliyên Navneteweyî ya Sendîkaya Mamosteyan a Brîtanyayê ku 500 hezar endamên xwe hene Chrîstîne Blowers jî got, "Heta ku Ocalan azad nebe, kes ji me azad nabe."

Yek ji mezintirîn rêxistinên civaka sivîl ên Brîtanyayê, Koalîsyona li dijî Şer (Top The War Coalîtîon) e. Serokê Giştî yê kaolîsyonê Mûrad Qûreshî jî işaret bi girîngiya azadiya Ocalan ji bo Rojhilata Navîn kir.

'YEKANE MUTEFÎKÊ ME YÊ LI HERÊMÊ, KURD IN'

Endama Desteya Rêveber a Kampanya Jûstîce For Kurdistan û Endama Meclîsa Şaredariya Ealîngê Dr. Aysha Raza jî got, "Ji bilî gelê Kurd mutefîkekî din ê pêşverûyên Brîtanyayî li herêmê nîne."

'OCALAN DIKARE TARÎTIYÊ RONÎ BIKE'

Nûnerê GMB'ê Dennîs McNûlty bi bîr xist ku sendîkayan dest bi 'Kampanya azadî ji Ocalan re' kirine û got, "Yekane tişta ku tarîtiya li Tirkiyeyê ronî bike, têkoşîna bi lîderiya Ocalan e."

Endamê Desteya Rêveber a Kampanya Jûstîce For Kurdistan û Endamê Kabîneya Şaredariya Brentê Tom Mîller, Endama Meclîsa Şaredariya Harîngeyê Makbûle Kuçuk, Endamê Meclîsa Şaredariya Kensîngton Chelsea Mohammed Bakthîar û Serokê Federasyona Elewiyan li Brîtanyayê Îsrafîl Erbîl jî têkoşîna gelê Kurd silav kirin.

Di dawiya resepsiyonê de bi navê Meclîsa Gelê Kurd a Brîtanyayê Elîf Sarican axivî.