Rêxistna HDP'ê ya Wanê, li ser betalkirina parlamenteriya Hevseroka Giştî Fîgen Yuksekdag civîneke çapemeniyê lidar xist û ev biryar protesto kir. Civîn li avahiya partiyê pêk hat û Hevserokên HDP'ê yên Wanê Yakûp Ataş, Gulîstan Orhan, Hevserokê DBP'ê yê Wanê Ayhan Aygun, endamê Meclîsa Partiyê ya HDP'ê Abdurrahman Dogan, Ozgur Zeydanoglû, rêxistinên bajar û navçeyan, Dayikên Aştiyê, aktîvîstên TJA û gel tevlî bûn.

Rêvebera HDP'ê ya Bajêr Leyla Işik li civînê axivî û got, "Fîgen Yuksekdag li kursiya meclîsê, wekhevî, biratî, edalet û azadî parast. Betalkirina parlamenteriya wê, darbeyek li vîna bi mîlyonan mirovî hatiye xistine ."

'WÊ NIKARIBIN TESLÎM BIGIRIN'

Işik diyar kir, her roj wekîlên HDP'ê binçav dikin, digirin û bi vê ve dixwazin HDP'ê ji Meclîsê ber bi kolanan ve dehf bidin. 

Işik da xuyakirin, ku pêşnûme qanûna AKP û MHP'ê ya ku ji Meclîsê re derbas kirin,  niha nikarin bi hilbijêrên xwe re bidin têgihiştin û zoriyan dikêşin.

Işik destnîşan kir, ku gelê Kurd û nûnerên wan nikarin teslîm bên girtin û got, "Em, betalkirina parlamenteriya Fîgen Yuksekdag protesto dikin. Em bang dikin ku her kes nerazîbûnê nîşan bide û bêjin NA. Cezayê ku bi qanûnên Qesrê tê dayîn û betalkirina parlamenteriyê ti hikmê xwe nîne.. Fîgen Yuksekdag îradeya me ye."