Saziya Serokatiya Konseya Neteweyî ya Bethnahrîn (MÛP), têkildarî qetlîamên AKP’ê yên li Cizîrê daxuyaniyek da.

Di daxuyaniya MÛB’ê de wiha hat gotin: “Roja 7’ê Sibatê 2016’an de jêrzemîna avahiya li Cizîr a ku sivîl û birîndar lê asê mabû hat bombardûmankirin û qetlîamek mezin pêk hat. Rastî ji raya giştî tê veşartin, henekên xwe bi rûmeta gelan û nirxên malbatan dikin.” 

MÛB’ê da xuya kirin ku hikûmeta AKP’ê 9 mehên dawî qetlîam kirin, Tirkiyeyê gav bi gav ber bi heza Rojhilata Navîn ve dibe. Daxuyaniyê wiha dom kir: “ Rêxistina wehşî ya DAÎŞ’ê her ku li Sûriye û li Iraqê derbeyên giran xwar, hikûmeta Erdogan û AKP weke ku tolê ji gelê xwe Kurd bistîne bi hemû hêza xwe êrîşî bajaran dike, hildiweşîne û qetlîaman pêk tîne. Qetlîamên li Cizîrê hatin kirin piştgiriya herî vekiriye ya ji bo çeteyên DAÎŞ’ê ye.”

 ‘LI WELAT Û DÎASPORAYÊ DENGÊN XWE BILIND BIKIN’

 MÛP’ê diyar kir ku wê hesabê hemû qetlîaman bê xwestin û wiha pê de çû: “ Rayedarên AKP’ê û TC’yê wê ji dadgehkirinê nikarebe bireve. Yên qetlîamên li Cizîrê pêk anîn şermezar û lenet dikin. Berxwedana gelê Kurd silav dikin. Ji bo xwedî li têkoşîna gelên bindest û têkoşîna gelên Suryanî- Asûrî- Kildanî û Aramî derkevin, bang li gelê xwe dikin ku li welat û xwedî dîasporayê xwedî li doza xwe derkevin û li hember zilmê dengê xwe bilind bikin.”