Gerîlayê HPG Remzî Kaya (Navdar Amed )ê ku di 20'ê Cotmehê de li navçeya Bazid a Agiriyê di serdegirtina malê de jiyana xwe ji dest dabû. Malbatê cenazeyê zarokê xwe ji Saziya Tiba Edlî ya Erziromê wergirt û anîn Amedê. Ji bo Kaya li Goristina Yenîkoya Rezan a Amedê merasîm hate li darxistin. Di merasîmê de parlementera HDP'ê ya Amedê Sîbel Yigîtalp, rêveberên HDP û DBP'ê yên Amedê û gelek welatî amade bûn. Piştî wecîbeyên olî dema girseyê darbesta Kaya li ser milan dibir goristanê polîsan derdora girseyê dorpêç kirin. Li gel hemû gef û dorpêçkirina polîsan girseyê cenazeyê Kaya definkir. Cenazeyê Kaya bi dirûşmeya " Şehîd namirin" û tilîliyan hate definkirin.

Piştî definkirinê, ji bo kesên di têkoşîna azadî û demokrasiyê de jiyana xwe ji dest dane rêz hate girtin. Di merasîmê de Hevserokê MEYA-DER yê Amedê Hasan Pençe diyar kir ku tehamûla dewletê li dijî cenazeyan jî nemaye û wiha got: "Êdî bes e ji vî şerî re. Ev şer şerê kursiyê Erdogan e. Em naxwazin ti kes bê qetilkirin." Pençe got ku ew ê têkoşin û berxwedana şervan û gerîlayên xwe bilind bikin.

Ji bo Kaya wê li Mala Şînê ya Temiran serdanên sersaxiyê bê dayîn.