Yuksekdag di daxuyaniya têkîldarî Qetlîama Parîsê de got, “Bi bîranîna Sakîneyan ji bo me tê wateya berxwedanê. Yên fermana qetilkirina wan da û ev organîze kirin wê negihêjin armancên xwe.”

Hevseroka Giştî ya Partiya Demokratîk a Gelan (HDP) Fîgen Yuksekdag, bi boneya salvegera Qetlîama Parîsê ji girtîgehê daxuyanî şand.

Daxuyaniya Yuksekdag wiha ye:

“Em sala 4’emîn a meşa nemiriya Sakîne, Leyla û Fîdanê de ne. 4 sal in, jin di rêka wan a azadiyê de dimeşin.

Digot, ‘jiyana min her şer bû’, Sakîne. Ev hevok di heman demê de bi me dide fêmkirin bê çima ew hatin hedefkirin. 3 qurnefîlên me, jinên şoreşger bûn ku jiyana xwe ji bo azadiya jinan û gelê Kurd kiribûn xelat. Her yekê, di siyasetê de însiyatîf û îradeya jinê kiribûn sembol.

Yên duh bi komploya navneteweyî ew qetil kirin, îro jî li ser gelan zext û zilmê ferz dikin, her roj welêt ber bi pêla tundiyê dibin. Yên duh hewl dan Sakîne Cansizan li Girtîgeha Amedê bi êşkenceyan bêzar bikin, îro îradeya siyasî ya zêdetirî 6 mîlyon mirovî di girtîgehê de rehîn digirin.

 Bi bîranîna Sakîneyan ji bo me tê wateya berxwedanê. Yên fermana qetilkirina wan da û ev organîze kirin wê negihêjin armancên xwe. Bi her bêhngirtina me, her çalakiya me, her strana me, her nîşaneya me ya serkeftinê em ê li girtîgehên ku em dîlgirtî ne, em ê 3 qurnefîlên xwe zindî bihêlin.

Ez mîrateya ku Sakîne, Leyla û Fîdanê hiştine, bi hurmet, hezkirin û hesret bi bîr tînim.”