Saziya Alîkariyê ya Kurdistanê Heyva Sor a Kurdistanê (HSK) li bajarê Essen ê Elmanyayê 25’êmîn Kongreya xwe li dar xist.

Di kongreya ku 100 delege û gelek mêvanan beşdar bû de, destpêkê Serokê Heyva Sor Dr. Rojvan Bîlgîn axivî.

Bîlgîn, di axaftina xwe de xebatên Heyva Sor yên sala 2016’an bi awayekî berferh nirxandin û got: “ Me berovajî salên derbasbûyî, sala 2016’an ji ber encamên xerab yên êrîşên dewleta Tirk, hemû derfetên xwe ji bo bicihanîna pêdiviyên jiyanî yên xelkê Cizîr, Sûr, Nisêbîn, Gever, Şirnex, Hezex, Silopî û hemû deverên wêrankirî bikar anîne.”

Dr.Rojvan Bîlgîn bi bîr xist ku wan li gel xwedîderketina li Bakurê Kurdistanê, destê alîkariyê dirêjî Şengal, Rojava û şêniyên taxa Şêx Meqsûd jî kirine.

Bîlgîn di berdewama axaftina xwe de bal kişand ser rewşa li bajar û navçeyên Bakurê Kurdistanê û wiha got: “Ew ê sala 2017’an ji bo bersivdayîna daxwazên kesên muhtaç hemû derfetên xwe seferber bikin.”

Rojvan Bîlgîn ji bo vê yekê bang li hemû Kurdistaniyên Ewrûpa û cîhanê kir ku bi awayekî çalak beşdarî kampanya Malbatên Xwişk û Bira bibin.

SARIYILDIZ: HEYVA SOR BÛ HÊVÎ

Piştî Dr. Rojvan Bîlgîn, parlementerê HDP’ê yê Şirnexê Faysal Sariyildiz axaftinek kir û got, bi saya alîkariyên hatine kirine, Heyva Sor a Kurdistanê bûye hêvî û cihê baweriya gelê Kurd û ji ber xebatên hatine kirin, malavahiya hemû kedarên Heyva Sor kir.

Nûnerên NAV-DEM, KOMAW û Federasyona Komelên Êzdiyên li Elmanyayê jî bal kişand ser girîngiya rista Heyva Sor a Kurdistanê.

Saziya alîkariyê ya Rojava, Heyva Sor a Kurd jî ji bo kongreyê peyam şand, ji ber xebatên ku li Rojava kirine, Heyva Sor a Kurdistanê silav kir.

Piştî axaftinan, dîwana Kongre hat hilbijartin û raporên xebat û darayê yên sala 2016’an hatin xwendin.

Di nirxandinan de hat gotin, ji ber êrîş û zilma dewleta Tirk, Heyva Sor a Kurdistanê sala 2016’an bi desteka Kurdistaniyên li Ewrûpa û cîhanê alîkariyek bi rûmet ji bo deverên wêrankirî yên Bakurê Kurdistanê hatine kirin.

Delegeyên raporên xebat û darayê erê kirin û soz dan ku ew ê sala 2017’an hê zêdetir ji bo bajar û navçeyên wêrankirî yên Bakurê Kurdisdistanê xebatên xwe zêde bikin.

Her weha hat gotin, ew ê hewldanên xwe ji bo bicihanîna pêwîstiyên Rojava û Şengalê jî dewam bikin.

Di dawiya Kongreyê, di encama hilbijartinan de Îpek Oztaş, Dr. Rojvan Bîlgîn, Srûşt Sabir, Mûsa Şêx Mûsa, Vahdettîn Kiliç,Çekdar Ûruç û Mûrat Vargun ji bo desteya rêveber a Heyva Sor a Kurdistanê hatin hilbijartin.