Namzetên parlamenteriyê yên HDP ên Kocaelî, piştî vekirina buroya hilbijartinê ya li Taxa Derînce Esentepe, Komeleya Çewligiyan ziyaret kirin. Serokê komeleyê Alî Degîrmencî û gelek Çewligiyên di serdanê de amade bûn, têkildarî hilbijartinê axaftin û nirxandin hatin kirin.

Piştî axaftina serokê komeleyê Alî Degîrmencî, Serokê Rêxistina HDP’ê ya Bajêr Mehmet Akgul, got ku hilbijartin di pêvajoyeke krîtîk de pêk tên û behsa girîngiya ku HDP bihêz ji vê pêvajoyê derkeve kir.

Namzeta HDP’ê yê rêza 2. Ayfer Koçak jî di axaftina xwe de bal kişand ser pirsgirêkên Kocaelî û got, “Zilma AKP’ê li holê ye.”

HDP ROJ BI ROJ MEZIN DIBE

Namzeta HDP'ê Prof. Dr. Nîlay Etîler jî di axaftina xwe de got ku HDP roj bi roj mezin dibe û dibe hêviya girseyên berfireh.

Namzetekî din ê HDP’ê  Sînan Odabaş jî wiha axivî: "Eger em jiyanê parve dijin, pêwîst e em siyasetê jî bi hev re bikin. Em ê aştî û demokrasiyê bînin welêt.”

Namzet  Guner Kîzîr jî diyar kir ku ew bawer e wê welatiyên Çewligê piştgiriyê bidin HDP’ê.

Namzet Alî Haydar Konca jî anî ziman ku wê HDP xebateke ku gel li ber çavan digire wê pêş bixe.

Dîlber Ornek a namzeta parlamenteriyê bi zaravayê Dimilkî bang li hemşeriyên xwe kir û got, “Eger em bi hev re bixebitin, wê rojên xweş werin.”

Welatiyên Çewligî jî diyar kirin ku eger HDP bendê derbas bike wê li welêt hevsengiya siyasî bê guhertin.