Bi hezaran kesî li dijî Neonaziyan çalakî lidar xistin. Balkêş e li dijî nîjadperestên li bajêr tên naskirin, polîs tiştekî nakin û dest li wan wernadin.

Bi bahaneya bombekirina Dresdenê di 13'ê Sibata 1945'an ji aliyê balafirên Brîtanya û Amerîkayê ve, bi sedan rastgirên tund xwepêşandan lidar xistin. Xwepêşandan ji aliyê Neonaziyê bi navê Gerhad Îttner ve hat organîzekirin, ku vî kesî ji ber propaganda sosyalîzma nasyonal û sûcê nefretê ceza xwaribû.

Xwepêşandanên li bajêr ji aliyê 2 koman ve bi beşdariya 850 nîjadperestan pêk hat. Polîsan dest li Îttner û qisekerên din wernedan, ku nîjadperestî û propaganda Neonazî dikirin. Di daxuyaniya polîsan de hat îdîakirin ku wê axaftin were nirxandin.

Li aliyê din, zêdeyî hezar kesên ji komên çep û demokrat, piştî nîvro li bajêr li hev civiyan û ji bo bendê deynin pêşiya Neonaiziyan, xwepêşandanek lidar xistin. Xwepêşandêr, ku piraniya wan xwendekarên zanîngehê ne, dest li meşa Neonaziyan werdan û hewl dan pêşî li axaftinan bigirin.