Feb 26, 2017

Mîhrîcana Cizîrê bi konsereke heybet bidawî bû

Mîhrîcana Cizîrê bi konsereke heybet bidawî bû

Wednesday, May 16, 2012 11:46 AM
Þirnex - ANF

6. Mihrîcana Rojên Çand û Hunerê ya Cizîrê ku bi dirûşma 'Ziman haveynê çandê ye' ji 12'ê mehê ve berdewam dikir bi tevlîbûna deh hezaran bi dawî bû.

6. Mihrîcana Rojên Çand û Hunerê ya Cizîrê ku ji aliyê Şaredariya Cizîrê ve ji 12'ê gulanê ve ye bi çalakiyên cihêreng berdewam dikir bi konsera fînalê ku zêdetirî 50 hezar kesî tevlî bû bi dawî bû. Di çarçoveya mîhrîcanê de di demjimêrên êvarê de li Navenda Çand û Hunerê ya Mem û Zîn belgefilma derhêner Sedat Bariş ya derbarê Komkujiya Roboskê de yekem car li Cizîrê hat pêşandan. Piştî pêşandan belgefilmê girse ber bi qada konserê ango Stadyûma Bajar ya Cizîrê ve herikî. Bi dehezaran kesên di ji çar milan ve ketin qadê hêj di demjimêrên destpêkê de qad tije kirin. Di konsera ku di destpêkê de ji bo kesên ku di têkoşîna azadî û demokrasiyê de jiyana xwe ji dest dane rêz hat girtin de bê navber dirûşmên 'Bijî Serok Apo', 'Şehîd namirin' û 'Ocalan' hatin berzkirin, posterên Rêberê Gelê Kurd Abdullah Ocalan û alên KCK'ê hatin libakirin.

COŞA KONSERÊ ZÊDE BÛ

Konsera fînalê ya ku biçûk-mezin, jin-mêr, pîr û kal ji heft heta heftê salî tevlî bûn de jinên cizîrî bi kincên neteweyî qad kirin deryaya rengan. Di qada konserê de bi sedan welatî û xebatkarên şaredariyê ewlehiyê wergirtin. Di konserê de destpêkê Koma Sorxwîn ku kar û xebatên xwe yên hunerê di bin baneya Navenda Çand û Hunerê ya Mem û Zîn ya Cizîrê didomîne û dûre jî Koma Laleş ku di bin baneya Navenda Çand û Hunerê ya Laleşê ya Silopiyê karên xwe yên hunerî dimeşîne derketin ser dikê demên xweş bi guhdaran dan derbaskirin. Piştre Koma Hijya Jinda derket ser dikê.

HOZAN COMERD KONSER DA

Dema ku Hozan Comert derket ser dikê gelê Cizîrê ji bo wê surprîzekê amade kiribû. Hozan Comert kêliya derket ser dikê esîmanên Cizîrê bi fîşekên hewayî bû meskenê ahenga rengan. Comert bi çepik, tilîlî û dirûşman hat pêşwazîkirin. Hozan Comert bi stran û klamên xwe yên yek ji yekî xweştir gel car caran coşand û car caran jî pêlên hizn û xemgîniyê bilind kir.

BAYÊ SERHEDO PÊLA GEL ZÊDE KIR

Comertê ku di bin pêla hezkirinê de ji ser dikê daket surprîza şevê jî hat anonskirin. Hunermendê ciwan Serhedo dema ku hat gazîkirin dengê çepik û tilîliyan bi hev re ji qadê bilind bûn. Piştî ku Serhedo bi stranên xwe ve gel coşand , ciwan û pîr bi hev re govend gerandin. Dema ku Serhedo li ser dikê bû 50 hezar kes bi yek dengî û bê navber dirûşmên, 'Bijî Serok Apo' û 'Şehîd namirin' berz kirin. Guleyên hewayî ku asîmanê Cizîrê dikir deryaya rengan bi pêlên strana Serhedo re gihîştin hev coşa gel derxistin asta herî jor. Serhedo jî di konserê de di navberê de diyar kir ku, ew gelek kêfxweşe ku li bajarê serhildanê li Cizîra Botanê ye.